Əliyev-Paşinyan görüşü - Moskva danışıqları bölgəyə sülh gətirəcəkmi?
Tarix: 23-10-2021 13:18 | Bölmə: Slayd
Əliyev-Paşinyan görüşü - Moskva danışıqları bölgəyə sülh gətirəcəkmi?

“Azərbaycan ölkəmizdə saxlanılan erməni diversantlarından daha bir neçəsini Ermənistana qaytardı. Bundan əvvəl də Azərbaycan humanizm nümayiş etdirərək belə addımlar atıb. Bütün bunlar göstərir ki, tərəflər arasında uzlaşma olacaq”.

Bunu Reyting.az-a siyasi ekspert Elman Vəliyev deyib.

Onun sözlərinə görə, Azərbaycan sülhə hazırdır, Ermənistan isə buna məcburdur.
Ermənistan Baş naziri Nikol Paşinyanın Azərbaycan tərəfinin əsirləri qaytaracağı təqdirdə minalanmış ərazilərin xəritələrini təqdim edəcəyi ilə bağlı dediklərini də xatırladan siyasi ekspertin fikrincə, tərəflər eyni masa arxasında əyləşəcəksə, Ermənistan minalanmış ərazilərin xəritəsini verəcək.

E. Vəliyev qeyd edib ki, digər vacib bir məqam Rusiya prezidenti Vladimir Putinin çıxışıdır: “Putin dedi ki, tərəflərin uzlaşmasına tərəfdardır. Hər iki tərəf arasında delimitasiya və demarkasiya məsələsi müzakirə ediləcək. Zənn edirəm ki, bu proses SSRİ-nin dağılması ərəfəsində olan xəritələrə deyil, Sovet Rusiyasının sərhəd xəritələrinə əsasən aparılacaq. Çünki SSRİ-nin dağılması ərəfəsində artıq Ermənistan Azərbaycanın bir çox ərazilərini işğal etmişdi”.

Ekspert əlavə edib ki, tərəflər Zəngəzur dəhlizi məsələsini də müzakirə edəcəklər:

“Dəhlizin açılacağına şübhəm yoxdur. Çünki Rusiya da bu məsələyə müsbət yanaşır. Rusiyanın dəhlizdə marağı olmasaydı, açılmasını istəməzdi. Ola bilər ki, dəhlizin mühafizəsini Rusiya öz üzərinə götürsün.

Xülasə, üçtərəfli görüş olacaq. Düşünürəm ki, Rusiya tərəflərə qarşılıqlı kompromis təklif edəcək. Azərbaycan tərəfinin güzəşti ölkəmizdə saxlanılan erməni hərbçilərin qaytarılması, Qarabağda ermənilərin də yaşamasına icazə verməsi olacaq. Ən əsası, Qarabağda qondarma rejimin ordusu olmayacaq, "Artsax”ın müstəqilliyi Ermənistan üçün sinə yarası olaraq qalacaq. Ermənistana da sərf edən elə bu variantdır”.

E. Vəliyev bildirib ki, Ermənistan Azərbaycanla uzlaşdıqdan sonra Türkiyə ilə də uzlaşmalar başlayacaq.

Onu da qeyd edək ki, erməni saytı “Aliq Media”nın yaydığı məlumata görə, noyabrın 9-da Moskvada Azərbaycan və Ermənistan liderləri arasında iki yeni sənədin imzalanacağı gözlənilir. Birinci sənəd Azərbaycan və Ermənistanın dövlət sərhədlərinin delimitasiya və demarkasiyasını əhatə edir. Sənəd, V. Putinin də vurğuladığı kimi, Bakı və İrəvan arasında bir-birlərinin sərhədlərini və ərazi bütövlüyünü tanıdıqlarını göstərən SSRİ-nin Müdafiə Nazirliyinin Baş Qərargahının 1920-ci il xəritələrinə əsaslanır.

İkinci sənəd regionda kommunikasiyanın açılması, xüsusən dəhliz yolunun, eləcə də Azərbaycan və Naxçıvan arasında yolun açılmasını əhatə edəcək.

İmzalanacaq sənədin bir müddət öncə Azərbaycan, Rusiya və Ermənistan Baş nazir müavinlərinin görüşü zamanı əldə olunan razılıqlar əsasında hazırlandığı bildirilir.

Reyting.az




Bölməyə aid digər xəbərlər
bütün xəbərlər
{sape_links}{sape_article}