Maliyyə bazarında ciddi problemlər yarana bilər - Deputat
Tarix: 12-01-2017 13:03 | Bölmə: İqtisadiyyat

Azərbaycan Mərkəzi Bankı bu gündən valyuta alqı-satqısındakı 4 faizlik marjanı aradan qaldırıb.

Reyting.az xəbər verir ki, bu barədə Mərkəzi Bankın sədri müavini bütün banklara, o cümlədən "Azərpoçt"a rəsmi məktub göndərib.

Məktubda deyilir ki, Mərkəzi Bankın İdarə Heyətinin 11 yanvar 2017-ci il tarixli qərarı ilə nağd və qeyri-nağd mübadilə əməliyyatları zamanı alış-satış məzənnəsinin rəsmi məzənnədən + 4 faiz həddində tətbiq olunan kənarlaşma həddi 12 yanvar 2017-ci ildən ləğv edilib.

Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov Mərkəzi Bankın "tam üzən məzənnə” siyasətinə keçməsi və 4 faizlik marjanın ləğv edilməsilə bağlı açıqlama verib.

Reyting.az-ın xəbərinə görə, V.Əhmədov Modern.az-a deyib ki, Mərkəzi Bank birdən-birə "tam üzən məzənnə” siyasətinə keçməyəcək:

"Bununla əlaqədar olaraq addımlar atılıb. Bu, "strateji yol xəritəsi”ndə öz əksini tapıb. Amma birdən-birə bu siyasətə keçmək qeyri-mümkündür. Çünki müəyyən problemlər yarana bilər.

Dünən Mərkəzi Bank və kommersiya banklarının birgə iştirakı ilə toplantı keçirildi. Banklara müəyyən göstərişlər verildi. Yəqin ki, bir müddət sonra nəticələrini görəcəyik”.

V.Əhmədov bildirib ki, dollar satışındakı 4 faizlik marjanın ləğvi "qara bazar”ın qarşısını alacaq:

"Marjanın götürülməsi "qara bazar”ın ləğvi və banklarda dollar satılmasını təmin edəcək. Amma bunlar müəyyən müddətdən sonra baş verəcək. Mən inanmıram ki, bu, qısa zamanda baş versin. Proses mərhələli şəkildə, təxminən 5-6 aya icra olunacaq. Əks təqdirdə, maliyyə bazarında ciddi problemlər yaranacaq”.

Deputat qeyd edib ki, ölkə başçısı Dövlət Neft Fondunun büdcəsini təsdiq edib və oradan 7, 5 milyon manat Mərkəzi Banka transfer nəzərdə tutulub. Bunun üçün də vaxt lazımdır.




180 dəfə oxunub.

Bölməyə aid digər xəbərlər