Bakının daha bir rayonunda ingilis layihəsinin tətbiqinə başlanılıb - Fotolar
Tarix: 03-03-2021 13:25 | Bölmə: Cəmiyyət
Bakının daha bir rayonunda ingilis layihəsinin tətbiqinə başlanılıb

2019-cu ilin iyul ayından Bakı Şəhər Mənzil Kommunal Təsərrüfatı Departamenti Böyük Britaniyanın “Mott MacDonald” şirkəti ilə birgə paytaxtın Nərimanov rayonunda pilot layihə həyata keçirir. Bərk məişət tullantılarının yığılması, daşınması və çeşidlənməsinin ən müasir səviyyədə təşkili ilə bağlı layihənin uğurlu olması bu layihənin növbəti mərhələsinə keçilməsinə imkan yaradıb. Görülən işlərin yüksək səviyyədə aparılması nəticəsində keçən müddət ərzində Nərimanov rayonunda xeyli irəliləyişlər əldə olunub. Bununla əlaqədar müqavilə şərtlərinə uyğun olaraq martın 1-dən etibarən paytaxtın Nizami rayonu da bu layihəyə qoşulub.

Reyting.az
-a verilən məlumata görə, işlərə hazırlıq ərəfəsində Nizami rayonunda 380 ədəd konteyner meydançası yaradılib, bura yaşıl və narıncı rəngli yeni, müasir konteynerlər quraşdırılıb. Rayonda əhali arasında maarifləndirmə işləri aparılır. Sakinlərin rahatlığı üçün hər mənzilə yaşıl və narıncı rəngli çeşidləyici paketlər və izahedici bukletlər paylanılıb, bloklara, həyətlərə, binalara maarifləndirici posterlər yapışdırılıb.

İlkin mərhələdə Bakı Şəhər və Nizami Rayon İcra Hakimiyyətlərinin əməkdaşları, bələdiyyə, təsərrüfat xidmətləri, gənclər və “Regional İnkişaf” İctimai Birliyinin könüllüləri təbliğat və izahetmə işlərində yaxından iştirak edirlər.

Hazırlıq işləri çərçivəsində Nizami rayonunun kommunal xidmət əməkdaşları Nərimanov rayonunda bu layihənin uğurlu tətbiqinin təcrübəsini yaxından öyrənib, kommunal təsərrüfatı işçiləri və könüllülər müvafiq qaydada təlimatlandırılıblar.

Görülən tədbirlərin nəticəsi kimi yeni layihənin Nizami rayonunda tətbiqinin ilk günlərindən müsbət nəticələr əldə edilib. Belə ki, əgər Nərimanov rayonunda layihənin tətbiqinin ilk günündə çeşidlənmiş tullantının həcmi bir gündə 4 ton, sonradan isə tədricən 6 və 8 ton olmuşdusa, Nizami rayonunda ilk gündə 12 ton çeşidlənmiş tullantı yığılaraq yığım məntəqəsinə təhvil verilib. Bu da ilk növbədə, Nərimanov rayonunda əldə edilən təcrübə, həmçinin könüllülərin, kommunal xidmət əməkdaşlarının sakinlər arasında apardığı düzgün maarifləndirmə işlərinin nəticəsidir.

Layihənin uğurla həyata keçirilməsi şəhərimizin təmiz saxlanılmasına, gözəlləşməsinə, ətraf mühitin və sağlamlığın qorunmasına, yeni ekoloji, sanitar mədəniyyətin formalaşmasına və iqtisadi səmərə əldə olunmasına xidmət edəcəkdir.





Bölməyə aid digər xəbərlər
{sape_links}{sape_article}