Uşaqlar üçün yeni müsabiqəyə start verilir
Tarix: 01-06-2022 11:36 | Bölmə: Mədəniyyət
Uşaqlar üçün yeni müsabiqəyə start verilir

Facebook sosial şəbəkəsinin ən məşhur kulinariya qruplarından biri olan “Азербайджанская Кухня и не только” qrupunda Uşaqların Beynəlxalq Müdafiəsi Günü ilə əlaqədar “Uşaqlar bişirir” adlı müsabiqə başlayır. İyun ayının 6-dan start veriləcək bu müsabiqə çərçivəsində uşaqlar hər həftə müvafiq olaraq tərəvəzlər, meyvələr, desertlər və s. hazırlayacaqlar. Hər həftənin sonunda isə bütün iştirakçıların reseptləri nəzərdən keçiriləcək və 3 qalib seçilib dəyərli hədiyyələrlə mükafatlandırılacaq.

Reyting.az
xəbər verir ki, müsabiqədə 2 yaşdan 18 yaşa qədər bütün uşaqlar iştirak edə biləcəklər. Əlbəttə ki, ailə üzvlərinin kömək etməsinə də icazə veriləcək. Belə ki, müsabiqənin məqsədi uşaqları mətbəxlə maraqlandırmaq, onlara ən sadə yeməkləri hazırlamağı öyrətmək, ailələri ilə birgə vaxt keçirib əylənməkdir.

“Hər il iyun ayında uşaqlar üçün müsabiqə keçirmək artıq ənənə halını alıb. Xatırlayırsınızsa, keçən il də bu vaxtlar biz “4 YEMƏK” adlı müsabiqəyə hazırlaşırdıq. İyun ayını tamamilə uşaqlara həsr edirik. Ümid edirəm ki, 1 ay ərzində gözəl nəticələr əldə edə biləcəyik və övladlarımız özləri üçün bəzi yeməkləri artıq müstəqil şəkildə hazırlamağı öyrənəcəklər. Mən özüm də böyük həvəslə balalarımla birlikdə bu müsabiqə üçün yeməklər hazırlayacağam”, - deyə qrupun admini və müsabiqənin müəllifi, səs aktyoru Kübra Kərimli vurğulayıb.



Müsabiqəyə qoşulmaq üçün Facebookdakı “Азербайджанская Кухня и не только” qrupuna üzv olmaq lazımdır: My Webpage

Müsabiqənin şərtləri haqqında ətraflı məlumat qrupda paylaşılacaq.

Xatırladaq ki, “Азербайджанская Кухня и не только” qrupu 2011-ci ildən fəaliyyət göstərir və qrupun 30000-ə yaxın üzvü var. Qrup maraqlı onlayn kulinariya müsabiqələri və faydalı rubrikaları ilə məşhurdur.




Bölməyə aid digər xəbərlər
{sape_links}{sape_article}