Politoloq Qələbə günü və Şuşada Azərbaycan bayrağının qaldırılacağı tarixi açıqlayıb
Tarix: 23-10-2020 19:07 | Bölmə: Slayd
Politoloq Qələbə günü və Şuşada Azərbaycan bayrağının qaldırılacağı tarixi açıqlayıb

“Azərbaycanda Rusiya prezidenti Vladimir Putinin sonuncu bəyanatına iki cür yanaşma var. Putin tarixçi deyil ki, Azərbaycan tarixini bilsin. Bu mənada onun məsələyə tarixi mövqedən yanaşması sözsüz ki, qüsurludur. Onun çıxışının birinci hissəsi haradasa erməniləri qane etdi. Yəni Putin tarixə ekskursiya edirsə, bunun nəticəsi Azərbaycan üçün uğursuz ola bilər. Amma Putin situasiyadan çox ağılla çıxdı. Həm siyasi baxımdan erməniləri məhv etdi, həm də öz seçimini müəyyənləşdirdi”.

Bu fikirləri Reyting.az-a politoloq Cümşüd Nuriyev deyib.

C. Nuriyev Rusiya prezidentinin “Valday” Diskusiya Klubunda Dağlıq Qarabağ münaqişəsi və həbi əməliyyatlar barədə dediklərini şərh edərkən xatırladıb ki, Ermənistan Kollektiv Təhlükəsizlik Müqaviləsi Təşkilatının (KTMT) və Avrasiya İqtisadi Birliyinin üzvüdür: “Baxmayaraq ki, Rusiya Qafqaz siyasətini 200 ildir ermənilərin əli ilə həyata keçirir, bunların fonunda Putin Azərbaycan və Ermənistan arasında fərq qoymadı. Açıq dedi ki, hər iki dövlət Rusiya üçün strateji tərəfdaşdır və Azərbaycan öz ərazisində müharibə aparır. Putin diplomatik yolla bildirdi ki, Rusiya bu müharibəyə qarışmayacaq. Ermənilərə mesaj verdi ki, gücünüz çatırsa, problemi özünüz həll edin”.


C. Nuriyev

C. Nuriyev ehtimal edir ki, Putinin məlum çıxışından sonra ABŞ proseslərə sürətlə müdaxilə etməyə çalışacaq: “Düzdür, bu gün ABŞ Dövlət katibi Pompeo ilə münaqişə tərəfi olan diplomatların görüşü əvvəlcədən müəyyənləşib. Əslində ABŞ-da seçkilər yaxınlaşır. Belə bir görüşün təşkili ilə Pompeo ABŞ prezidenti Trampa səs qazandırmaq niyyətindədir. Bu da siyasi gedişdir. Hətta Putinin məlum mövqeyindən sonra bəzi konqresmenlər bizim əleyhimizə qanun layihələri hazırlamağa başlayıb. ABŞ-da ermənipərəstlərin fəallaşması müşahidə edilir. Amma nə Azərbaycan dövləti, nə də xalqımız 30 il əvvəlki deyil. Üstəlik, artıq biz dünyada tək deyilik”.

Politoloq xüsusilə qeyd edib ki, Rusiya prezidenti Putinin Türkiyə haqqında xoş fikirlər işlətməsi təsadüfi deyil: “Putin qeyd etdi ki, Türkiyə ilə müəyyən anlaşılmazlıqlar olsa da, Ərdoğanla əməkdaşlıq ona xoşdur. Açıq dedi ki, Ərdoğan müstəqil xarici siyasət yürütməklə yanaşı sözünə sadiq liderdir. Bir dövlət başçısı digər dövlət başçısı haqqında bundan artıq daha hansı xoş sözü desin ki? Nəzərə alsaq ki, Putin kifayət qədər peşəkar, uzaqgörən və məkrli siyasətçidir, məncə, o, danışıqlarında Azərbaycan tərəfə müsbət mesaj verdi, nəinki erməniləri rahatlaşdırdı.

Aydındır ki, Putin Ermənistanda Paşinyan hökumətinin iqtidarda qalmasını arzu etmir. Məncə, ABŞ-da erməni lobbisinin fəallaşması həm də Paşinyanı hakimiyyətdə saxlamaq üçün atılan addımdır. Mən inanmıram ki, Paşinyan uzun müddət hakimiyyətdə qala bilsin. Müharibənin ilk günlərində - biz Cəbrayılı işğaldan azad etdikdən sonra onun hakimiyyətdə qalması 70-in 30-a nisbətindəydisə, hazırda 50-nin 50-yə nisbətindədir. Çox güman ki, Paşinyanı ya öldürəcəklər, ya da tezliklə iqtidardan uzaqlaşdıracaqlar”.

C. Nuriyev Azərbaycanın qələbəsinin 9 noyabrda olacağını, həmin tarixdə Şuşada bayrağımızın asılacağını düşünür:

“Xankəndi, Ağdam, Xocalını götürmək problem deyil, onlar çökəklikdə yerləşir. Azərbaycan əsasən yüksəklikləri işğaldan azad edir. Artıq döyüşlər Laçın ərazisində gedirsə, bunun özü vəziyyətin real göstəricisidir. Bir aydan azdır vuruşuruq, düşmən 30 ildir cəbhədə möhkəmlənib, amma Azərbaycan Ordusu 3 günə cəbhə xəttini yara bilib. Bu dəqiqə Azərbaycan Ordusu yüksək səviyyədə əməliyyatlar keçirir”.

Reyting.az




Bölməyə aid digər xəbərlər
bütün xəbərlər
bütün xəbərlər
{sape_links}{sape_article}