Laçın dəhlizində Azərbaycan sərhədçiləri və gömrük əməkdaşlarımız durmalıdır - Siyasi şərhçi
Tarix: 11-01-2021 16:22 | Bölmə: Slayd
Laçın dəhlizində Azərbaycan sərhədçiləri və gömrük əməkdaşlarımız durmalıdır

“Moskvada hansı müzakirələrin aparılacağı, hansı nəticələrə gəlinəcəyini öncədən demək mümkün deyil. Hər halda tərəflərin Moskvada nələri müzakirə edəcəyi şəxsən mənə məlum deyil. Yalnız görüşün nəticəsinə əsasən nəsə demək mümkün olacaq”.

Bu fikirləri Reyting.az-a siyasi şərhçi Elçin Şıxlı Moskvada başlayan Əliyev-Putin-Paşinyan görüşünü şərh edərkən deyib.

E. Şıxlı əlavə edib ki, bu müzakirədə Azərbaycanı əsasən özünün maraqları düşündürür: “Əgər söhbət ölkəmizin maraqlarından gedirsə, sözsüz ki, ölkəmizin rəhbəri üçtərəfli bəyannamənin bəndlərinin yerinə yetirilməsi məsələsini qaldıracaq. Çünki bəyannamənin heç də bütün bəndləri yerinə yetirilməyib. Ermənistanın hərbi qulluqçuları hələ də Qarabağa gəlirlər. Rus sülhməramlıları özlərinə aid olmayan işlərlə məşğuldur. 1960 nəfər əvəzinə deyəsən orada iki mindən artıq rus kontingenti var. Ruslar Laçın dəhlizində nədənsə bizim sərhədi qoruyur. Fikrimcə, bu, yolverilməzdir. Onlar ancaq dəhlizdəki təhlükəsizliyi qoruya bilərlər. Sərhəddə Azərbaycan sərhədçiləri, ordumuzun nümayəndələri və gömrük əməkdaşlarımız olmalıdır. Ermənilər də kənar ölkə vətəndaşı kimi pasport nəzarətindən keçib Xankəndinə getməlidirlər. Məsələn, Ermənistan xarici işlər naziri Xankəndinə gəlir. Normalda sülhməramlılar onu Azərbaycan ərazilərinə buraxmamalı idi, amma buraxırlar. Odur ki, sərhəddə biz durmalıyıq”.


E. Şıxlı

E. Şıxlı xatırladıb ki, ruslar Dağlıq Qarabağda xəstəxanalar tikirlər, ermənilərin sağlığına içirlər, erməniləri geriyə çağırırlar və s. Ümumiyyətlə, sülhməramlı missiyaya aid olmayan fəaliyyətlə məşğuldurlar: “Görünür, havalanıblar, onlara elə gəlir ki, Azərbaycan diplomatik şəkildə bəyannamənin imzalanmasına razılıq veribsə, deməli, onlar özlərinə Azərbaycanda “xozeyin” kimi aparmalıdırlar. Mən qəti əminəm ki, Azərbaycanın dövlət başçısı bu məsələləri Moskvada qaldıracaq və bu məsələlərdə təkid edəcək”.

Reyting.az




Bölməyə aid digər xəbərlər
bütün xəbərlər
bütün xəbərlər
{sape_links}{sape_article}