Komanda üzvüləri Putinə qarşı çıxır - Professor
Tarix: 25-01-2021 16:20 | Bölmə: Slayd
Komanda üzvüləri Putinə qarşı çıxır

“Yanvarın 23-də Rusiyanın əksər əyalətlərində ciddi etiraz aksiyalarının keçirilməsi baş tutsa da, hələlik nəyin necə olacağı bilinmir. Hər halda aksiyaya kifayət qədər insanın çıxması onu göstərir ki, əhali prezident Putindən bezib. Əslində Aleksey Navalnının özü də mürəkkəb fiqurdur. Rusiya dövləti daxilindən ona informasiyalar ötürülür. Bu da, ona dəlalət edir ki, dövlətin daxilində də Putinin dəyişdirilməsinin lazım olduğunu düşünənlər var”.

Bu sözləri Reyting.az-a professor Əli Abbasov müxalif bloqçu Aleksey Navalnının həbsindən sonra Rusiyada baş verən etiraz aksiyaları və onun mümkün nəticələri haqda danışarkən deyib.

Professor bildirib ki, Putini hakimiyyətdən uzaqlaşdırmaq üçün resursun olub-olmadığını indidən demək çətindir: “Amma küçədəkilərlə yuxarı dairələrdə təmsil olunanlar arasında birlik yarandıqda, lazım olan resurslar tapılır. Hər halda 2021-ci ildə böyük dəyişikliklər olmalıdır. Söhbət təkcə Rusiyadan getmir, bütövlükdə dünyada belə bir proses olacaq”.


Ə. Abbasov

ABŞ-da C. Baydenin hakimiyyətə gəldiyini xatırladan Ə. Abbasov əlavə edib ki, ABŞ prezidentinin Rusiya ilə bağlı hansı planları reallaşdıracağı da maraqlıdır: “Sadəcə, əlamətlər göstərir ki, bu il çox şeylər ortaya çıxacaq”.

Siyasi şərhçi əlavə edib ki, atıq Putin yorulub, daha əvvəlki illərdə görünən enerjili Putin yoxdur: “Bəzən deyirlər ki, Rusiya prezidenti vaxtını daha çox bunkerdə keçirir. Reallıq budur ki, Putin əvvəlki kimi enerjili görünmür. Enerjili olmadıqda isə ortaya problemlər çıxmağa başlayır”.

“Vladimir Putini kim əvəz edə bilər” sualına gəldikdə, Ə. Abbasov deyib ki, hazırda buna cavab tapmaq çox çətindir: “Rusiyanın özündə belə ən aktual sual budur. Demək çətindir. Mümkündür ki, aralıq fiqur kimi Mişustin ortaya çıxsın. Amma belə baxanda, birinci sırada olmayan şəxslərdən fərqli bir lider də ortaya çıxarıla bilər. Şəxsən mən Medvedevin irəliyə buraxılacağına inanmıram. Bu şəxs faktiki Rusiya siyasətində yoxdur, sanki belə adam heç olmayıb. Onda siyasi iradə yoxdur. Mən artıq 2021-ci ildə Rusiyada ciddi proseslərin olacağını gözləyirəm, sadəcə, deyə bilmərəm ki, proseslər hansı istiqamətdə gedəcək. Vəziyyət çətin olacaq. Düşünürəm ki, bizi siyasi baxımdan çox maraqlı il gözləyir”.

Reyting.az




Bölməyə aid digər xəbərlər
bütün xəbərlər
{sape_links}{sape_article}