Qərbi Azərbaycandan sonuncu deportasiya aktından 33 il ötür
Tarix: 06-12-2021 10:37 | Bölmə: Slayd
Qərbi Azərbaycandan sonuncu deportasiya aktından 33 il ötür

Qərbi Azərbaycandan azərbaycan türklərinin sonuncu deportasiyasının 33-cü ili tamam olur. Azərbaycan Deportasiya Qurbanları Cəmiyyəti bununla əlaqədar bəyanatla çıxış edib.

Reyting.az
-ın xəbərinə görə, bəyanatda qeyd olunur ki, 1988-ci ilin noyabr-dekabr aylarında indiki Ermənistan Respublikası adlandırılan qədim türk yurdu - Qərbi Azərbaycandan 100 minlərlə azərbaycan türkü deportasiya edilib.

1988-ci ildə indiki Ermənistandan azərbaycanlıların kütləvi deportasiya aktının təsadüfi olmadığını vurğulayan Azərbaycan Deportasiya Qurbanları Cəmiyyəti bəyan edir ki, bütün bunlar düşünülmüş və planlaşdırılan sistemli fəaliyyətin sonuncu mərhələsi olub.

“Deportasiya Qurbanları Cəmiyyəti 1988-ci ildə həyata keçirilən deportasiya aktını Azərbaycan xalqına qarşı əsası 200 il əvvəl Çar Rusiyası tərəfindən qoyulan, SSRİ zamanı davam etdirilən anti-türk və anti-islam siyasətinin davamı, əsas məqsədin isə bölgədə ermənilər üçün daha münasib şərait yaratmaq olduğunu qeyd edir”,- bəyanatda bildirilib.

Deportasiya Qurbanları Cəmiyyəti xatırladıb ki, Azərbaycanın mərhum prezidenti Heydər Əliyev 1997-ci ilin dekabr ayının 18-də “1948-1953-cü illərdə azərbaycanlıların Ermənistan SSR ərazisindəki tarixi-etnik torpaqlarından kütləvi surətdə deportasiyası haqqında” fərman imzalayıb. Bu tarixi sənəd azərbaycanlıların Ermənistan SSR ərazisindəki tarixi-etnik torpaqlarından kütləvi surətdə deportasiyasının hərtərəfli tədqiq edilməsini, Azərbaycan xalqına qarşı dövlət səviyyəsində həyata keçirilən bu tarixi cinayətə hüquqi-siyasi qiymət verilməsini və onun beynəlxalq ictimaiyyətə çatdırılması məqsədilə işlər görülməsini nəzərdə tutub.

Cəmiyyət bildirir ki, anti-türk siyasətinin davamı olaraq indiki Ermənistan adlandırılan tarixi türk torpaqlarından sonuncu kütləvi deportasiya aktı 1988-ci ilin noyabr-dekabr aylarında həyata keçirilib, nəticədə Ermənistan adlanan ölkədə türklərin tarixi-etnik təmizlənməsi prosesi başa çatdırılıb. Bu zaman Ermənistanın 22 rayonunda və 300 kəndində yaşayan 250 min nəfər azərbaycanlı öz tarixi torpaqlarından qovulub, erməni quldur dəstələrinin vəhşiliyi nəticəsində yüzlərlə azərbaycanlı qətlə yetirilib.

Deportasiya Qurbanları Cəmiyyəti 1988-ci ilin noyabr-dekabr aylarında baş verən sonuncu deportasiya aktının 33-cu ilində, bu hadisəni təkrar pisləyir, Sovet strukturları, kommunist partiyasının rəhbərliyi və hərbçilərinin dəstəyi sayəsində erməni quldur dəstələrinin həyata keçirdiyi bu anti-insani akta beynəlxalq hüquqi qiymət verilməsini tələb edir.

Bildirilir ki, SSRİ-nin süqutu ərəfəsində Qərbi Azərbaycandan 250 min insanın planlı şəkildə və zor gücünə deportasiya edilməsi həm də SSRİ-nin dağılmasından sonrakı mərhələdə onların indiki Ermənistan adlanan dövlətdən öz müqəddəratını təyin etmə hüququndan mərhum edilməsinə hesablanan siyasi qərar olub.

Deportasiya Qurbanları Cəmiyyəti 44 günlük savaş nəticəsində Azərbaycan Respublikasının işğala məruz qalan ərazilərinin əhəmiyyətli hissəsinin azad edilməsini salamlayır, xüsusilə prezident İlham Əliyevin Qərbi Zəngəzur, Göyçə, Dərələyəz, Zəngibasar və digər tarixi torpaqlarımızla bağlı fikirlərini birmənalı dəstəkləyir.

Deportasiya Qurbanları Cəmiyyəti ümid edir ki, Qərbi Azərbaycandan mərhələli deportasiya aktlarına, bu tarixi torpaqlarda türk izinin və mədəniyyətinin vəhşicəsinə silinməsinə baxmayaraq, günün birində hökmən vətənin həmin hissəsində Azərbaycanın dövlət bayrağı dalğalanacaq.




Bölməyə aid digər xəbərlər
bütün xəbərlər
{sape_links}{sape_article}