Tarix: 23-01-2017 16:10 | Bölmə: Slayd
Sentyabr ayında ölkəmizdə keçirilən referenduma görə məzuniyyət hüququndan istifadə edə bilməyən rayon icra başçıları və bəzi nazirlər hazırda xarici ölkələrdə istirahət edirlər.
Reyting.az-ın məlumatına görə, icra başçılarının əksəriyyəti məzuniyyət hüququndan tam istifadə etmək fikrindədir. Hətta elə icra başçıları var ki, dekabr ayının 29-dan məzuniyyətə çıxaraq, müxtəlif xarici ölkələrə səfər ediblər.
Məlumatda bildirilir ki, məzuniyyətə çıxan icra başçılarından heç biri ölkə daxilində dincəlməyib. Onların çoxu səhhətini bəhanə edərək, ölkəni tərk ediblər.
İcra başçılarının əsasən Almaniya, Çexiya və Rusiyada dincəlməyə üstünlük verdikləri bildirilir. Amma 20 Yanvar faciəsi ilə bağlı tədbiri əsas tutaraq məzuniyyətini buna uyğun planlaşdıran icra başçıları da olub. Məsələn, Daşkəsən və Suraxanı rayonlarının icra başçıları 20 Yanvar ərəfəsində ölkəyə dönərək, iş başına keçiblər. Lakin hələ də geri dönməyənlər var. Qaradağın icra başçısı Süleyman Mikayılov və digərlərinin hələ də ölkə xaricində olduqları bildirilir.
Məlumatda qeyd edilir ki, prezident İlham Əliyevin rəhbərliyi ilə mart ayında regionlardakı sosial-inkişaf və digər nəzərdə tutulan proqramların icrası ilə bağlı daha bir müşavirə keçiriləcək. İcra başçıları və cavabdeh nazirlərin iştirakı ilə hesabat xarakterli müşavirə həm də bir sıra icra başçıları üçün ciddi sınaq olacaq.
Məlumatlı şəxs, prezidentin son aylar dəfələrlə "İcra başçılarının fəaliyyətlərinə rayona cəlb edəcəkləri investisiya və xalqın necə xidmətçisi olmaları baxımından qiymət veriləcək",- sözlərini xatırladaraq bildirib ki, bundan nəticə çıxarmayan onlarla rayon rəhbəri var. Dövlət başçısının bu tələbindən nəticə çıxarmayanlara qarşı sərt tədbirlər görüləcək:
"Böyük ehtimalla bu dəfə barələrində daha çox şikayət və korrupsiya ittihamları səslənən Bərdə, Beyləqan, Zərdab, Sabirabad, İmişli, Neftçala, Hacıqabul, Ağstafa, Tərtər, Ağdam, Goranboy, Ağdaş, Şamaxı, Masallı, Astara, Lerik, Xızı və digər rayonların icra başçıları hədəfdə olacaqlar".
Qarşıdakı aylarda daha çox pambıqçılıq rayonlarının icra başçılarının fəaliyyətinə nəzarət ediləcəyi bildirilir. Bu il pambıq əkini və yığımında gözlənilən proqnoz və nəticələrə əməl edə bilməyən rayon rəhbərləri ilə bağlı qərar ilin sonuna saxlanılmayacaq. Yəni, əkin yerləri xüsusi nəzarətə götürüləcək. Dövlət səviyyəsində xüsusi diqqət ayrılan bu prosesə laqeyd yanaşan icra başçılarına qarşı sərt qərar veriləcək.
Bölməyə aid digər xəbərlər