Avropa çempionatının final oyunu da başa çatıb. Final oyununda Portuqaliya və Fransa komandaları qarşılaşıb. Portuqaliya komandasının aparıcı futbolçusu Kriştiano Ronaldo matçın 17-ci dəqiqəsində Dmitri Paye ilə mübarizədə dizindən zədə alıb. Ronaldo həkimlərin müdaxiləsindən sonra yenidən meydana qayıtsa da, oyunu davam etdirə bilməyib. Bu səbəbdən də onu əvəzləmək məcburiyyətində qalıblar. 31 yaşlı futbolçu meydanı xərəkdə gözyaşları ilə tərk edib.

Oyunun sonrakı hissəsində Fransa bir neçə dəfə hesabı açmağa yaxın olsa da, meydan sahibləri bunu bacarmayıblar. Beləliklə, oyunun əsas vaxtı heç-heçə yekunlaşıb.

Əlavə vaxtda isə Portuqaliyanın oyunçusu Eder 109-cu dəqiqədə hesabı açıb. Sonrakı dəqiqələrdə isə Fransa hesabı dəyişə bilməyib. Beləliklə, Portuqaliya ilk dəfə Avropa çempionu olub.