Xalq artistinin 75 illik yubileyi qeyd olunub
Tarix: 08-07-2022 11:21 | Bölmə: Mədəniyyət
Xalq artistinin 75 illik yubileyi qeyd olunub
Mikayıl Mirzə

Ağsu rayon Mədəniyyət Sarayında AMEA Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran regional filialı bədii qiraət ustası, Xalq artisti Mikayıl Mirzənin 75 illik yubileyinə həsr olunan tədbir keçirib.

Reyting.az
-ın məlumatına görə, muzeyin Aran regional filialının müdiri, filologiya üzrə fəlsəfə doktoru Yaqut Bahadurqızı görkəmli sənətkarın zəngin yaradıcılığından, emosionallığı ilə seçilən özünəməxsus ifa üslubundan danışıb. Bildirib ki, Mikayıl Mirzə yaratdığı rolları təbii, inandırıcı şəkildə tamaşaçılara çatdırıb, sənətkar “Azərbaycanfilm” kinostudiyasında lentə alınan bədii filmlərdə, onlarla dram əsərində yaddaqalan obrazlar yaradıb.

Sonra çıxış edən Ağsu rayon icra hakimiyyətinin başçısı Rövşən Bağırov Xalq artisti Mikayıl Mirzənin ictimai-siyasi fəaliyətindən, sovet quruluşuna qarşı 90-cı illərdə poeziya salonlarında, şeir məclislərində, meydanlarda apardığı açıq mübarizədən bəhs edərək bildirib ki, tamaşaçı kütləsi onu müxtəlif ekran əsərlərindəki və televiziya tamaşalarındakı obrazlarında tanıyıb sevib.

Mikayıl Mirzənin sənət dostu, tələbəsi olmuş Xalq artisti Nurəddin Mehdixanlı isə çıxışında bədii qiraət ustasının ekran əsərlərində rol aldığı obrazlarından danışıb. O, sənətkarın teatrda Leonard Frankın “Yad adam” əsərində Qoca, Səməd Vurğunun “Vaqif” dramında Kürd Musa, “Fərhad və Şirin”də Fərhad, İlyas Əfəndiyevin “Bizim qəribə taleyimiz” əsərində Eyvaz, “Tənha iydə ağacı”nda Muratov, M. İbrahimovun “Kəndçi qızı”nda Aslan, Bəxtiyar Vahabzadənin “Fəryad”ında Zahid, “Yollara iz düşür” əsərində Şair, Cəfər Cabbarlının “Od gəlini”ndə Elxan, Anarın “Sizi deyib gəlmişəm”ində Sabir, “Adamın adamı”ında Tərs Tahir, Abdulla Şaiqin “Fitnə” əsərində Bəxtiyar, C. Məmmədquluzadənin “Dəli yığıncağı”nda Cinli Mustafa, H. Cavidin “İblis”ində İxtiyar və digər obrazları böyük məharətlə oynadığını vurğulayıb. “Mikayıl Mirzə xarekterik obrazları – “Günahsız Abdulla” əsərində Abdulla obrazını, C. Cabbarlının “Aydın” pyesində Aydın obrazını daha böyük şövqlə oynayırdı. Mikayıl Mirzə istedadlı rejissor kimi “Aydın” pyesini yeni ruhla, yeni quruluşda tamaşaya hazırladı”, -deyə Nurəddin Mehdixanlı qeyd edib.

Tədbirdə, həmçinin Xalq artisti Əli Nur, Milli Məslisin deputatı Tahir Kərimli, Ağsu rayon Ağsaqqllar Şurasının sədri Seyfəddin Abdullayev çıxış edərək Mikayıl Mirzənin çoxşaxəli yaradıcılığından, dostluğa və yoldaşlığa sədaqətindən, insani keyfiyyətlərindən söhbət açıb, onunla bağlı xatirələrini bölüşüblər.

Daha sonra VIII Respublika Muğam Müsabiqəsi laureatı Sabir Hüseynov, aşıq Amil Dadaşov öz ifaları ilə məclisə rövnəq veriblər. Həmçinin məktəblilər Mikayıl Mirzənin qələmə aldığı şeirləri səsləndiriblər.

Tədbirdə Mikayıl Mirzənin rol aldığı Azərbaycan kinofilm studiyasında lentə alınmış “Uzun ömrün akkordları”, “Topal Teymur” filmlərindən epizodlar və vaxtilə sənətkarın ifasında lentə alınmış şeirlərdən ibarət videoçarx nümayiş olunub.

Sonda görkəmli sənətkarın ailəsi adından çıxış edən Mətin Mirzə atasının xatirəsinə göstərilən diqqətə görə tədbirin təşkilatçılarına və iştirakçılarına təşəkkürünü bildirib.




Bölməyə aid digər xəbərlər
{sape_links}{sape_article}