Teyyub Qənioğlu: “Aztəminatlı ailələr kommunal xərclərdən azad edilməlidir”
Tarix: 14-08-2020 15:55 | Bölmə: Siyasət
Teyyub Qənioğlu: “Aztəminatlı ailələr kommunal xərclərdən azad edilməlidir”

Azərbaycan Təkamül Partiyası (ATP) Mərkəzi Şurası Siyasi Bürosunun videokonfrans formatında iclası keçirilib. ATP-nin mətbuat xidmətindən Reyting.az-a verilən məlumata görə, iclasda ölkəmizdə mövcud ictimai-siyasi vəziyyət və pandemiya şəraitində partiyanın fəaliyyəti, ATP-nin yaradılmasının 25 illiyinin qeyd edilməsinə hazırlıqla bağlı məsələlər müzakirə edilib.

İclası giriş sözü ilə açan partiyanın sədri Teyyub Qənioğlu ölkəmizdə mövcud ictimai-siyasi vəziyyət haqqında geniş məlumat verib. Koronavirus pandemiyasının ölkə iqtisadiyyatına və əhalinin yaşayış səviyysəsinə mənfi təsirlərinin minimuma endirilməsi istiqamətində dövlət səviyyəsində həyata keçirilən tədbirlərin Təkamül Partiyası tərəfindən müsbət qiymətləndirildiyini nəzərə çatdıran T.Qənioğlu, eyni zamanda bu istiqamətdə əlavə tədbirlərin həyata keçirilməsinin vacibliyini də qeyd edib.

Müzakirələrin gedişində pandemiyanın işsiz, işini müvəqqəti itirmiş insanlara, eləcə də, aztəminatlı ailələrə mənfi təsirini azaltmaq üçün bu kateqoriyadan olan əhali təbəqəsinin kommunal xərclərdən azad edilməsinin məqsədəuyğun olduğu bildirilib. Müzakirələr zamanı pandemiyanın mənfi təsirlərinin azaldılması, onun yayılmasının qarşısının alınması üçün tətbiq edilən karantin rejiminin əhali üçün, xüsusilə də, dolanışığını gündəlik məşğulluqla təmin edən insanlar üçün əlavə çətinliklər yaratdığı qeyd edilib, bu vəziiyətin keçici olduğuna inam ifadə olunub. Bununla yanaşı, bəzi partiyaların karantin rejiminin insanlar üçün yaratdığı diskomfort şəraitindən özlərinin müəyyən məqsədləri üçün istifadə etmək, həyata keçirilən məhdudlaşdırıcı tədbirləri siyasiləşdirmək, insanları mitinqlərə dəvət etmək cəhtləri pislənib, indiki şəraitdə belə hərəkətlərin məqsədəuyğun olmadığı qeyd edilib.

Siyasi Büro üzvüləri ATP-nın pandemiya şəraitində indiyədək həyata keçirdiyi fəaliyyətin eyni istiqamətdə davam etdirilməsinin vacibliyini vurğulayıblar.

T. Qənioğlu nəzərə çatdırıb ki, sentyabr ayının 01-də ATP-nin yaradılmasının 25 ili tamam olur. Partiya, onun üzvüləri üçün bu əlamətdar hadisənin vacibliyini qeyd edən T. Qənioğlu, karantin rejiminin tələbləri nəzərə alınmaqla, yubileyin geniş qeyd edilməsinin məqsədəuyğun olduğunu nəzərə çatdırıb.

Müzakirələrin gedişində yubileyə hazırlıqla bağlı məsələlər ətrafında fikir mübadiləsi aparılıb və müvafiq qərarlar qəbul edilib.

Reyting.az




Bölməyə aid digər xəbərlər
bütün xəbərlər
bütün xəbərlər
{sape_links}{sape_article}