Prezident İlham Əliyevin Donald Trampın təşəbbüsü ilə ABŞ-da keçirilən Sülh Şurasının tədbirində iştirakı Bakının qlobal diplomatik platformalarda fəal mövqeyini nümayiş etdirir. Bu addım eyni zamanda Azərbaycanın beynəlxalq sülh və təhlükəsizlik məsələlərində artan rolunun təsdiqi kimi qiymətləndirilir. Belə platformalar Azərbaycan üçün həm siyasi dialoqu gücləndirmək, həm də milli maraqları daha geniş auditoriyaya çatdırmaq baxımından mühüm əhəmiyyət daşıyır.

Demokratik İslahatlar Partiyasının (DİP) sədri, deputat Asim Mollazadə məsələni “Reytinq” qəzetinə şərh edərkən bildirib ki, Azərbaycan liderinin Amerikaya səfəri yüksək səviyyədə baş tutub və bu, dövlətimizin nüfuzunun göstəricisidir.

Onun sözlərinə görə, bu səfər əvvəlkilər kimi Prezident İlham Əliyevlə ABŞ lideri Donald Tramp arasında yüksək səviyyəli, dostluq və qarşılıqlı hörmətə əsaslanan münasibətlərin mövcudluğunu bir daha nümayiş etdirir.

A. Mollazadə hesab edir ki, prezidentlər arasındakı yüksək səviyyəli münasibətlər ölkələrimiz arasında əlaqələrin inkişafına və qarşılıqlı faydalı əməkdaşlığın genişlənməsinə şərait yaradır.

Milli Məclisin üzvü xatırladıb ki, Əliyevin ABŞ səfəri beynəlxalq nüfuzlu təşkilatın yaradılması ilə bağlı tədbirdə iştirak məqsədi daşıyıb:

“Tədbir zamanı Azərbaycan lideri qeyri-rəsmi olaraq bir sıra həmkarları ilə təmas qurub, fikir mübadiləsi aparıb. O cümlədən ABŞ prezidenti ilə də yüksək səviyyəli münasibətlərin olduğu açıq şəkildə göründü. Bunlar müsbət hadisələrdir və Azərbaycanın artan nüfuzunu göstərir. Burada Prezident İlham Əliyevin liderlər arasında formalaşmış nüfuzuna da diqqət yetirilməlidir. Bəli, Azərbaycan liderinin dünya liderləri ilə müsbət və etibarlı əlaqələri var. Bu da ölkəmizə əlavə dividendlər qazandırır”.

Mollazadə sonda əlavə edib ki, müasir dünyada BMT-nin öz üzərinə düşən vəzifələri tam şəkildə həyata keçirə bilməməsi fonunda Sülh Şurasının nüfuzu artır: “Azərbaycan da bu qurumun yaradılmasına töhfə verib və ənənələrinə sadiq qalaraq təşkilat daxilində humanitar siyasətə üstünlük verir”.

Nemət ORUCOV

Reyting.az