Professor: “Mavi yanacağa və elektrik enerjisinə tətbiq edilən limit ləğv olunmalıdır”
Tarix: 01-11-2019 15:04 | Bölmə: Slayd
Professor: “Mavi yanacağa və elektrik enerjisinə tətbiq edilən limit ləğv olunmalıdır”

“Qiymət artımını öncədən proqnozlaşdırmaq çətindir. Elə vəziyyət yaranar ki, qiymət qəfil qalxa bilər. Yəni dəyişikliklər mümkündür və heç kəs deməsin ki, qiymət sabitdir. Bazar iqtisadiyyatı şəraitində qiymət qalxa da, enə də, sabit də qala bilər”.

Bu sözləri sabiq deputat, iqtisadçı professor Əli Əlirzayev Reyting.az-ın soyuqların düşməsi ilə ölkədə bəzi məhsullar üzərində qiymət artımının müşahidə olunması ilə bağlı sualına cavabında deyib.

Professorun sözlərinə görə, dövlətin qiymət siyasəti var. Dövlət siyasəti bilavasitə özünün oyunçu kimi bazara daxil olması deyil, qiymətləri tənzimlənməsinə əsaslanır: “Sözsüz ki, qiymətlər tənzimlənməlidir. Bəzi ailələr kasıbdır, bəziləri orta təbəqəyə şamil olunur, bəzi ailələr isə zəngindir. Kimin imkanı varsa, özünə bahalı avtomobil ala bilər. Amma ucuz avtomobili kasıblar alırsa və çox alınırsa, qiymətin qaldırılması doğru deyil. Eləcə də çörək və ya yumurtanın qiyməti. Vacib ərzaq məhsullarının qiyməti sözsüz ki, dövlət tərəfindən tənzimlənməlidir. Ancaq bu o demək deyil ki, sahibkar öz məhsulunu maya dəyərinə və ya sıfır qiymətinə satmalıdır. Sahibkar da rəqabət mühitinə girməli, rəqabət apararaq malını satmalı və mənfəət götürməlidir. Söhbət ondan gedir ki, möhtəkirlik olmamalıdır. Belə halların baş verməməsinə dövlət nəzarət etməlidir”.

Mütəxəssis əlavə edib ki, qiymətlərin dəyişməsi əslində normal prosesdir:

“Bəzən hansısa sahəni böhrandan çıxarmaq üçün həmin sahə üzrə qiymət artırıla bilər. İşıq, qaz, metrodan hamı istifadə edir. Sözsüz ki, xərclər artanda vəziyyət pisləşir. Xərclər artdıqda, gəlirlər də artırılmalıdır ki, arada yaranan fərq kompensasiya olunsun. Belə hallarda pensiyalar, maaşlar, tələbə təqaüdləri də artırılmalıdır. Bunlar analitik şəkildə bir-birinə bağlı məsələlərdir”.

Ə. Əlirzayev deyib ki, qiymətin dəyişməsindən qorxmaq lazım deyil, qiyməti ədalətli şəkildə tənzimləmək siyasətini daha da genişləndirmək lazımdır.

Professor bildirib ki, əslində mavi yanacağa və elektrik enerjisinə tətbiq edilən limit ədalətsiz yanaşmadır: “İlk dəfə mən təklif etmişəm ki, limitdən imtina edilsin. Niyə? Çünki burada ədalət prinsipi pozulur. Tutaq ki, mən kənddə yaşayıram, alternativ variantlarım olmadığından enerjidən çox istifadə edirəm. Və həm də buna görə pul ödəyirəm. Pulum varsa, enerjidən səhərə qədər istifadə edirəm. Əgər pulum yoxdursa, məcburam ki, qaz və ya elektrikə qənaət edim. Amma alıcını kateqoriyalara bölmək, sən varlı olduğundan sənə baha satacağam, sən kasıb olduğun üçün başqa qiymətə alacaqsan,- yanaşması bu mənada ədalətli deyil”.

Reyting.azскачать dle 10.5фильмы бесплатно




Bölməyə aid digər xəbərlər
{sape_links}{sape_article}