“Qarabağdakı sülhməramlılar Fransa və ABŞ-la bazarlıq edir” - Professor
Tarix: 07-05-2021 18:05 | Bölmə: Slayd
“Qarabağdakı sülhməramlılar Fransa və ABŞ-la bazarlıq edir”

“Münaqişələri idarə etmək əslində “nəzarətli xaos” deməkdir. Rusiyanın öz ətrafında yaratdığı münaqişələri “idarə etməsi” onun bölgəni yaxşı tanımasından irəli gəlir. Eyni zamanda həmin ölkələrdə Rusiyaya yaxın güc və qrupların olmasından doğur”.

Bu fikirləri Reyting.az-a professor Toğrul İsmayıl “Rusiyanın ətrafında idarə etdiyi regional münaqişələr və resurslar”dan danışarkən deyib.

Professor bildirib ki, Rusiya üçün belə münaqişələr öz varlığını qorumaq, eyni zamanda Qərb və digər güclərlə bazarlıq üçün vacibdir: “Qarabağ nümunəsini götürək. Sonuncu dəfə sülhməramlı adı altında Xankəndi şəhərinə yerləşiblər. Sülh missiyasını yerinə yetirmək əvəzinə Fransa və ABŞ-la bazarlıq edirlər. Yəni öz maraqları çərçivəsində istənilən siyasəti aparırlar. Bu da normaldır”.


T. İsmayıl

T. İsmayıl əlavə edib ki, Rusiya dövlət kimi bölgədə varlığını qorumaq istəyirsə, deməli, əlindən gələni edəcək: “Lakin biz bilməliyik ki, bütün münaqişələrin təməlində Rusiyanı görmək doğru deyil. Təbii ki, Qarabağ, Donbas, Dnestryani münaqişələrə baxdıqda görürük ki, bunlar SSRİ dövründən qalan və həm də düşünülmüş nəzarət tədbiridir. Qarabağ müharibəsi zamanı da bunu gördük. Başqa sözlə, onlar nə Azərbaycanın, nə də Ermənistanın deyil, öz maraqları çərçivəsində hərəkət edirlər. Ancaq Orta Asiya və digər yerlərdəki münaqişələrin təməli sovet dövründə atılsa da, son Qırğızıstan-Tacikistan münaqişəsində Rusiyanın əli olduğunu zənn etmirəm. Sadəcə, Rusiya bölgəni yaxından tanıdığı və həm də qonşu olduğu üçün daha tez reaksiya verir. Normalda ABŞ da eyni şəkildə nəzarət etdiyi və yaxın olduğu ölkələrdə bunu edə bilir. Bu da əslində bazarlıq, mövcudluq, manipulyasiya gücünü göstərməkdir”.

T. İsmayılın fikrincə, bütün siyasət və davranışlar müəyyən yerə qədər işləyəcək:

“Nəzərə alınmalıdır ki, zaman və dövran dəyişib. Dövlətlərin müstəqillik istəkləri artıb. Belə olduğu zaman köhnə siyasi vasitələr işə yaramır. Odur ki, Rusiya da daxil olmaqla bir çox dövlətlər öz siyasətini ya düzəltməlidir, ya da gərginliklər artmalıdır”.

Reyting.az




Bölməyə aid digər xəbərlər
bütün xəbərlər
{sape_links}{sape_article}