Natiq Cəfərli: “Qapanma çarə deyil, virusla birgə yaşamağı öyrənməliyik”
Tarix: 24-07-2021 18:04 | Bölmə: Slayd
Natiq Cəfərli: “Qapanma çarə deyil, virusla birgə yaşamağı öyrənməliyik”

“Dünyada gedən proseslər göstərir ki, pandemiya dövründə virusa münasibət getdikcə dəyişir. Yəni virusla birgə yaşamağın yollarını axtarırlar. Delta ştammının ən çox tüğyan etdiyi ölkələrdən biri Rusiyadır. İndi Rusiyada koronavirusa həm yoluxma, həm də ölüm sayında yüksək göstəricilər müşahidə olunur. Rusiyada gündəlik ölüm sayı 800 civarındadır. Heç pandemiyanın ən qızğın dövründə bu qədər insan ölmürdü. Amma bütün bunlara baxmayaraq Rusiya nə iqtsadiyyatını, nə də turizm sektorunu qapatmır. Çünki bunun ciddi təsir olacağını gözləmir. Vaksinasiyanın sürətlənməsi yolu ilə pandemiyanın indiki dalğasını keçməyi, ümumiyyətlə, virusla birgə yaşamağın yollarını axtarır”.

Bu fikirləri Reyting.az-a iqtisadçı Natiq Cəfərli pandemiyanın bundan sonra iqtisadiyyata və insanlara gətirəcəyi ziyandan danışarkən deyib.

Natiq Cəfərli İngiltərəni də nümunə kimi diqqətə gətirib: “18 yaşlı əhalinin 70 faizdən çox hissəsinə vaksin vurulub. Orada ölüm halı aşağı olsa da, yoluxma siyahısı çox yüksəkdir. Buna baxçayaraq London məhdudiyyətləri aradan qaldırıb. Yəni bir çox ölkələrin təcrübəsini öyrənərkən görürük ki, qapanma virusla mübarizədə ciddi irəliləyişə təsir göstərmir.

Bəli, ötən ilin mart ayında qapanmanın məntiqi vardı. Çünki virus təzə idi, dünya onu öyrənirdi. Eyni zamanda vaxt qazanmaq və səhiyyə sistemini virsula mübarizəyə hazırlamaq, yeni xəstəxanalar inşa etmək, süni nəfəs avadanlıqları almaq, dərman ehtiyatını yaratmaq üçün qapanma anlaşılan idi. İndi isə qapanmalar virusla mübarizədə ciddi nəticələr əldə etmək baxımından effektiv deyil. Bu, dünyada sübut olunub”.

Cəfərli bildirib ki, Azərbaycanda qapanmalarla bağlı müzakirələri doğru hal saymır:

“Nəzərə almaq lazımdır ki, MDB ölkələri içərisində vaksinasiyada ən yüksək səviyyə bizdədir. Az qala 4,5 milyon insanımız vaksin olunub. Vaksinləşmə sürətlə aparılır. Bu da pozitiv haldır.

Yoluxma ilə bağlı son bir neçə gündür artım müşahidə edilir. Bundan əvvəl aşağı səviyyədə idi. Odur ki, yoluxma sayını izləməklə yanaşı qapanmadan daha çox virusla birgə yaşamağın yollarını tapmalıyıq. Bu nə deməkdir? O deməkdir ki, qapalı məkanlarda vətəndaşın da məsuliyyəti olmalı, qaydalara əməl etməlidir. Eyni zamanda dövlətin də yanaşması dəyişməlidir. Yəni qapanmanı çarə kimi görmək düzgün deyil”.

İqtisadçı əlavə edib ki, qapanma virusu məhv etmir, əksinə, iqtisadiyyatda durğunluq yaradır, vətəndaşları kasıblaşdırır və işsizliyi artırır: “Bu, dünyada da müşahidə olunan haldır. Ötən il ÜDM mənfi 4,3 faizlə bitirdik. Bu ilin əvvəlində durğunluq idi, amma son iki aydda təxminən ÜDM-i 2 faiz artımla müşahidə edirik. Odur ki, qapanma haqda düşünməyi düzgün saymıram. Azərbaycan da digər ölkələr kimi virusla yaşamağın yollarını tapmalı, qapanmadan daha çox vətəndaş-dövlət məsuliyyətinin paralel həyata keçirilməsi ilə yaşamağı öyrənməliyik”.

Reyting.az




Bölməyə aid digər xəbərlər
{sape_links}{sape_article}