Rusiya “Su-35” və “Su-30SM2” qırıcıları əvvəlki R-77-1-in mənzilini (təxminən 100 km) xeyli üstələyən 320 km-ə qədər mənzilli R-37M hava-hava raketləri ilə təchiz olunur və bu, müəyyən risklər yaradır.

Reyting.az xəbər verir ki, bunu Kral Birləşmiş Xidmətlər İnstitutunun eksperti Castin Bronk bildirib.

“Business Insider” K. Bronkdan sitat gətirib: “Bu, NATO-nun hava əməliyyatları üçün potensial təhlükəni artırır”.

Alyans daxilində RS-AA-13 kimi tanınan R-37M əvvəllər əsasən “MiQ-31”də istifadə olunsa da, hazırda Rusiyanın hava üstünlüyü üçün əsas təyyarə olan “Su-35S”də müntəzəm olaraq quraşdırılır. Bronkun sözlərinə görə, “Su-35” ekipajları diqqətlə seçilir və yaxşı təlim keçirlər ki, bu da onların hücumlarını daha effektiv edir.

Bronk vurğulayır ki, qırıcıların müntəzəm olaraq R-37M-lərlə təchiz edilməsi və yerüstü hava hücumundan müdafiə sistemləri ilə inteqrasiyası Qərb hava qüvvələri üçün hava döyüşünün mürəkkəbliyini artırır. Onun hesablamasına görə, Ukraynadakı müharibə zamanı rus pilotlarının qazandığı döyüş təcrübəsi onların təyyarələrini 2022-ci ildə olduğundan daha potensial Avropa təhlükəsi halına gətirib.

Ukraynanın tammiqyaslı işğalı zamanı bir neçə “Su-35”in itirilməsinə baxmayaraq, təyyarə donanması artıb. Bronk hesab edir ki, hazırda Rusiyada təxminən 135-140 ədəd “Su-35” qalıb. R-37M raketlərinin uzun mənzilli olması və onların hava hücumundan müdafiə sistemləri ilə inteqrasiyası bu təyyarələri NATO ilə potensial münaqişələrdə, xüsusən də hava-yer qarşılıqlı əlaqələrində ciddi amil halına gətirir.

Eyni zamanda, ekspert qeyd edir ki, Qərb hələ də havada əhəmiyyətli üstünlüklərə malikdir, lakin yeni Rusiya sistemləri NATO üçün taktiki mənzərəni xeyli çətinləşdirir.

ELÇİN