Müəllimlər sertifikatlaşdırmaya cəlb olunacaq - Qaydalar
Tarix: 18-06-2021 16:06 | Bölmə: Slayd
Müəllimlər sertifikatlaşdırmaya cəlb olunacaq

Dövlət ümumi təhsil müəssisələrində çalışan təhsilverənlərin sertifikatlaşdırılması keçiriləcək. Reyting.az-ın xəbərinə görə, Təhsil Nazirliyindən bildiriblər ki, sertifikatlaşdırmada məqsəd müəllimlərin bilik səviyyəsini qiymətləndirmək, onların inkişafına nail olmaq və təlim ehtiyaclarını öyrənməkdir.

Prosesə cəlb ediləcək pedaqoji heyət əvvəlcədən bu barədə məlumatlandırılacaq.

Sertifikatlaşdırma ilə bağlı proqramın hazırlanması da nəzərdə tutulur. Təhsilverənlərin sertifikatlaşdırılması prosesinin cari təqvim ilinin sonunda həyata keçirilməsi planlaşdırılır. Hazırda isə sertifikatlaşdırma prosesinə hazırlıq məqsədilə sınaq imtahanları keçirilir.

Sertifikatlaşdırmanın keçirilmə qaydasına gəldikədə, nazirlikdən bildiriblər ki, test imtahanı mərhələsində imtahan sualları təhsilverənlərin tutduğu vəzifə üzrə əmək funksiyasına, peşəsinə (ixtisasına) və tədris etdiyi fənnə aid olmaqla tərtib ediləcək.

Bu mərhələdə təhsilverənlərə 120 dəqiqə müddətində tədris etdiyi fənn üzrə ümumtəhsil proqramlarına, tədris metodikasına və təlim strategiyalarına aid 60 sual təqdim olunacaq. Hər düzgün cavab 1 balla qiymətləndiriləcək. Bu mərhələnin nəticələri üzrə balların hesablanması avtomatlaşdırılmış rejimdə proqram təminatı vasitəsilə həyata keçirilir və imtahan başa çatdıqdan dərhal sonra namizədə elan edilir. Test imtahanında azı 30 bal toplamış təhsilverənlər sertifikatlaşdırmanın müsahibə mərhələsinə buraxılacaqlar.

Müsahibə mərhələsində hər bir təhsilverənə 20 dəqiqə vaxt ayrılacaq. Bu mərhələdə təhsilverənlər aşağıdakı meyarlar əsasında maksimum 40 balla (4 ballıq şkala ilə) qiymətləndiriləcək:

- proqram üzrə mövzunu təqdimetmə bacarığı - x3

- təhsilalanların qiymətləndirmə bacarığı - x2

- özünü təqdimetmə bacarığı - x2

- pedaqoji prosesi təşkiletmə bacarığı - x2

- ünsiyyət bacarığı - x1.

Müsahibə zamanı azı 20 bal toplamış təhsilverənlər həmin mərhələdən keçmiş hesab edilirlər.




Bölməyə aid digər xəbərlər
bütün xəbərlər
{sape_links}{sape_article}