Ermənistan təklif edilən güzəştlərə destruktiv yanaşır
Tarix: 21-07-2021 17:42 | Bölmə: Slayd
Ermənistan təklif edilən güzəştlərə destruktiv yanaşır

"Ermənistan tərəfinin atəşkəsi pozmasından və hələ də yaşanan gərginliklərdən sonra prezident İlham Əliyevin Moskvada Vladimir Putin ilə görüşməsi proseslərin Azərbaycanın lehinə gedəcəyini göstərir".

Bunu Reyting.az-a siyasi ekspert Elman Vəliyev deyib.

E. Vəliyev bildirib ki, Rusiya prezidenti Putin tezliklə Azərbaycana bir nümayəndə heyəti göndərəcəyini deyib. Bu heyət nəqliyyat, sənaye, infrastruktur və digər sahələrdə əməkdaşlıq edəcək:

"Moskva görüşündən əvvəl Avropa İttifaqı Şurasının Prezidenti Şarl Mişel Azərbaycana səfər etmişdi. Mişel bir çox sənaye, infrastruktur obyektləri ilə yaxından tanış oldu. O, Azərbaycanla əlaqələri möhkəmləndirməyin vacib olduğunu bildirdi. Əlbəttə ki, Azərbaycan həm Avropa İttifaqı, həm də Rusiya üçün lazımlı dövlətdir. Ölkəmizin təbii ehtiyatları, strateji mövqeyi buna imkan yaradır. “Bölgədə güclü rəqabət gedir”,- desək yanılmarıq. Rusiya həmin nümayəndə heyətini göndərərək digərlərini qabaqlamaq istəyir".

Ekspert vurğulayıb ki, İkinci Qarabağ müharibəsində Azərbaycanın qələbəsindən sonra xeyli dövlət və şirkətlər Azərbaycanla əlaqələri intensivləşdiməyə səy göstərirlər:

"Azərbaycan Rusiya üçün həm önəmli qonşu, həm də strateji əməkdaşdır. Rusiya bunu yaxşı anlayır. Rusiya zənginliklərə malik olan bir qonşusunda ondan xeyli uzaqda duran dövlətlərin üstünlüklər əldə etməsini, möhkəmlənməsini istəməz. Onun üçün ehtiyatını əvvəlcədən görür. Azərbaycan da yaxşı bilir ki, Rusiya ilə münasibətləri nə qədər gücləndirsə, bir o qədər yaxşıdır. Rusiya kimi güclü qonşu ilə əlaqələri korlamaq yaxşı olmaz. Azərbaycan üçün əsas əməkdaşlıq, tərəfdaşlıq, beynəlxalq aləmə inteqrasiya lazımdır. Azərbaycan qapalı dövlət rolunu oynamır. Azərbaycan ədəbi ilə salam verənlərə qapısını həmişə açıq qoyub. Yerini bilməyənlərə isə yerini göstərib. Ermənistan buna yaxşı nümunədir".

E. Vəliyev qeyd edib ki, regionda balanslar artıq dəyişib və hadisələrə fərqli prizmadan baxılır:

"Azərbaycan regionda böyük ağırlığa malik bir gücə çevrilir. Prezidentin "Dağlıq Qarabağ yoxdur, sadəcə, Qarabağ var”,- deməsindən sonra səhv etmirəmsə, Şarl Mişel də, Putin də "Dağlıq" sözünü işlətmədi.

Ermənistan tərəfi ona təklif edilən güzəştlərə destruktiv yanaşır. Bu yanaşmaya həm daxili auditoriya, həm də xarici təhrikçilər səbəb olur. Daxili auditoriya iqtidarın sülhə getdiyini görüb çaxnaşma yarada, çevrilişə cəhd edə bilər. Elə müxalifət, araqarışdıranlar da bir fürsət gözləyir. Xarici himayədarlar üçün də alovun sönməsi deyil, yanılı qalması prestijlidir".

Onun sözlərinə görə, Naxçıvanla sərhəddə yerləşən Arazdəyən bölgəsində son günlər intensiv atışmalar müşahidə olunur və qarşı tərəfə istinadla Azərbaycan qüvvələri bir xeyli irəliləyiş əldə edib: "Ehtimal edirəm ki, yaxın zamanda bu istiqamətdə proseslər lehimizə gedəcək.

Azərbaycan tərəfi Ermənistana Qazax rayonunun işğalda olan kəndlərini, Naxçıvanın Kərkisini razılıqla verməyi, Zəngəzur dəhlizinin açılmasının vacibliyini bildirdi və Azərbaycanın ərazi bütövlüyünü tanımasını diktə etdi. Ancaq Ermənistan tərəfi "Dağlıq Qarabağın müstəqilliyinin tanınması” qarşılığında sülhə gedəcəyini bildirmişdi. Yəni lokanik desək, sülhdən imtina edir, işləri çətinləşdirir, amma kompromis daha sərf edəndir".

Reyting.az




Bölməyə aid digər xəbərlər
bütün xəbərlər
{sape_links}{sape_article}