16:27 / 22-08-2019
Bakıda taxta bazarı yanır
Batan gəminin kapitanı - M. Əliyeva
Tarix: 16-03-2019 13:13 | Bölmə: Mətanət ƏLİYEVA
Batan gəminin kapitanı

İki aydan çoxdur yazmıram. Hesab edirəm ki, yazmaqdan keçib, əməl dəyişməlidir.

Düşünürəm ki, ölkəmiz parlamentli respublika olsaydı, 5 ildən bir demokratik seçkilər keçirilsəydi, siyasətlə məşğul olanlar həqiqi siyasi mübarizə aparsaydı, mətbuat da bu ədalətli mübarizəni işıqlandırsaydı, daha yaxşı olardı. Təəssüf ki, bunların heç biri yoxdur. İndiki halda hakimiyyəti yalnız zorakı yolla dəyişmək mümkündür. Bunun nəticələri isə faciəvi ola bilər. Amma qanunlara söykənən dəyişiklik mütləq olmalıdır.

Artıq 25 illik mövcud hakimiyyətdən doymuşuq. Yaxşı işlərinə görə sağ olsunlar. Yollar çəkilib, yeni xəstəxanalar, məktəblər tikilib, əhalinin işini asanlaşdıran “ASAN Xidmət” yaradılıb və sair. Əvvəlki hakimiyyətlə sonrakıların düşmənçiliyinə də son qoyulmalıdır.

Prezident son aylar kasıbları yadına salıb, tədbirlər görür. Bunun davamını gözləyirəm, amma nikbin deyiləm, çünki ölkənin 90 faizini təşkil edən kasıblar elə bir quyunun dibindədir ki, bu hökumət onları quyudan çıxara bilməyəcək. 10 min dollar kredit məsələsində güzəşt etməklə vəziyyət düzəlməz. Rayon əhalisinin həm banklara, həm sələmçiyə, həm də ərzaq mağazalarına borcu var. Borclar gündən-günə böyüyür.

2 milyondan artıq vətəndaşımız ağır mühacirət həyatı yaşayır. Onların taleyi çox az adamı maraqlandırır.

Kənd təsərrüfatı naziri İnam Kərimovun aqrar sektoru inkişaf etdirəcəyinə də əmin deyiləm. Bunun səbəbini xırdalamaq istəmirəm. Amma əminəm ki, belə idarəçilik davam etdikcə vəziyyət gündən-günə ağırlaşacaq. Dövlət səviyyəsində israfçılığın nəticəsi dilənçilik olacaq. Bu hakimiyyətin ən bağışlanılmaz əməli onların yaxın ətrafının qanunları və xalqı saymamasıdır.

Mən özümü dahi Lev Tolstoyla müqayisə etmək istəmirəm. Tolstoy əsərlərində, o cümlədən “Dirilmə” romanında yazırdı ki, Rusiyada bütün sahələrdə korrupsiya, oğurluq baş alıb gedir, tüfeyli həyat tərzi keçirən zadəgan sinfi, din xadimləri mənəviyyatlarını itiriblər, yeganə işıqlı qüvvə inqilabçılardır.

Çar Nikolay yazılanlardan nəticə çıxarmaq əvəzinə Tolstoyu sürgün etmək istəyirdi. Nəticədə inqilab baş verdi, sadə xalq azadlıq əldə etdi, zadəganlar güllələndi və ya sürgün edildilər, kasıb mühacirə çevrildilər. Ən böyük faciəni isə çar Nikolayın ailəsi yaşadı.

Vətəndaşlar hakimiyyəti sevməsələr də, onu dəyişmək istəyən qüvvəyə də qoşulmaq istəmirlər. Çünki ABŞ-ın dəstəklədiyi qüvvələrin hakimiyyətə gəlməsindən qorxurlar, fikirləşirlər ki, vəziyyət daha da pis ola bilər, Əfqanıstanın, Suriyanın, İraqın vəziyyətinə düşərik. Elə bir an gələr ki, insanlar nifrətdən real düşüncə hissini itirə bilər.

Üzdə olan çərənçi “politoloqlar”ımızı görəndə adam deməyə söz tapmır. Əslində bizdə vəziyyət Əfqanıstandan yaxşı deyil. Fərq ondadır ki, bizdə vətəndaş müharibəsi getmir, sovet Azərbaycanının bəxş etdiyi təhsil və səhiyyə sistemini tam dağıda bilməyiblər.

Hazırda ölkəmizin real mənzərəsi belədir ki, torpaqların 20 faizi işğaldadır, vətəndaşların 20 faizdən çoxu mühacirətdədir, məhkəmə, prokurorluq, polis başda olmaqla dövlət strukturları maksimum korrupsiyalaşıblar, əksər insanların mənəviyyatı məhv edilib, oğurluq, fahişəlik, narkomanlıq, yaltaqlıq xərçəng xəstəliyi kimi metastaz verib. Ölkəni bu vəziyyətə gətirən hakimiyyət isə onu bu vəziyyətdən çıxarmağa qadir deyil.

Dahi fransız diplomatı Taleyran tez-tez mövqeyini dəyişdiyi üçün bəziləri onu satqın hesab edirdi. Görəndə ki, kral dövləti süquta aparır Taleyran kralı devirmək istəyənlərə qoşulurdu. Onu satqın hesab edənlərə Taleyran belə cavab vermişdi:

- Mən görəndə ki, gəmi batır, onu limana çıxarmışam. Fərqi yoxdur bu hansı limandır.

Kralı satmaq satqınlıq deyil, əsl satqınlıq dövləti və xalqı satmaqdır. Bizim dövlət gəmimiz də batır, onu limana çıxarmalıyıq. Fərqi yoxdur gəminin yeni kapitanı kim olacaq. Bu kapitan da gəmini batırmaq istəsə, onu yeni kapitana dəyişib gəmini limana çıxararıq. Korrupsiya bataqlığında üfunətli palçığın bizi boğmasından canımızı qurtarmalıyıq. Mübarizəsiz yaşamaq ölməkdən pisdir.(“İmpuls” qəzeti) скачать dle 10.5фильмы бесплатно




Bölməyə aid digər xəbərlər
bütün xəbərlər
{sape_links}{sape_article}