Nazirlik teatrla bağlı araşdırma aparır
Tarix: 22-09-2022 13:18 | Bölmə: Xəbər lenti / Mədəniyyət
Nazirlik teatrla bağlı araşdırma aparır

“Teatrda 12 nəfərə yaxın “ölü canlar”ın olmağı yenilik deyil. Mən Mingəçevir Teatrında 8 aya yaxındır, işləyirəm və bu aylar ərzində nə bir aktyoru işə götürmüşəm, nə də kimisə işdən çıxarmışam”.

Reyting.az
xəbər verir ki, bunu APA-ya açıqlamasında Mingəçevir Dövlət Dram Teatrının baş rejissoru Vüsal Mehrəliyev deyib.

O bildirib ki, teatrda adı ştatda olub, lakin aktyor kimi fəaliyyət göstərməyən şəxslərin varlığından xəbərdardır: “Biz bunu həll etməyə çalışsaq da, hələ ki, həllini tapmayıb. Çünki mən nə işə adam götürürəm, nə də işdən adam çıxarıram”.

Mingəçevir Dram Teatrının direktoru Anar Quliyev isə bildirib ki, teatrda "ölü canlar"ın olması faktı yalandır: "Qəti olaraq, deyirəm ki, bizim teatrda "ölü canlar" yoxdur və ola da bilməz. Mən 8 ildir, teatrda çalışıram və onun il yarımını teatrda direktoram. Burada məsələ odur ki, deyilən 10-12 adam teatrda aktyor ştatında qeydiyyatdadır, lakin işçi kimi teatrın sexində çalışır, yaxud dekorasiya işləri ilə məşğuldur və yaxud tamaşanın hazırlanması üçün lazım olan digər sahələrdə fəaliyyət göstərirlər. Yəni onlar aktyor ştatındadır, sadəcə ehtiyac var deyə, digər yöndə fəaliyyət göstərirlər. Bu, bütün dünyada ola biləcək bir haldır, praktikadır. Yekun olaraq deyim ki, "ölü canlar" məsələsi Mingəçevir Dram Teatrında yoxdur".

Mədəniyyət Nazirliyindən isə bildiriblər ki, teatrın direktoru və baş rejissoru nazirliyə dəvət olunub: “Sözügedən məsələ ilə bağlı araşdırma aparılır. Məsələ öz həllini tapdıqdan sonra ictimaiyyətə əlavə məlumat veriləcək”.

Qeyd edək ki, bir neçə gündür, sosial şəbəkələrdə Mingəçevir Dövlət Dram Teatrında "ölü canlar"ın - adı ştatda olub, özü işə gəlməyən şəxslərin olması barədə narazılıqlar yazılır. Bildirilib ki, sözügedən qüsuru rəhbərlik bilsə də, heç bir tədbir görülmür.




Bölməyə aid digər xəbərlər
20-09-2022, 12:04 Arye Qut vəfat edib

{sape_links}{sape_article}