Zelenski: Rusiya müharibəni dayandırmağa məcbur olacaq
Tarix: 13-03-2025 16:54 | Bölmə: Dünya
Zelenski: Rusiya müharibəni dayandırmağa məcbur olacaq

Ukrayna prezidenti Vladimir Zelenski ümid edir ki, ABŞ-nın təzyiqi Rusiyanı müharibəni dayandırmağa məcbur etmək üçün kifayətdir.

Reyting.az
xəbər verir ki, o, bunu Ukrayna nümayəndə heyətinin ABŞ nümayəndələri ilə Səudiyyə Ərəbistanında keçirdiyi görüşlə bağlı hesabatından sonra bildirib.

Zelenski qeyd edib ki, iki nümayəndə heyəti arasında söhbət son dərəcə konstruktiv keçib.

Onun sözlərinə görə, Ukrayna nümayəndələri Amerika tərəfini Ukraynanın fundamental mövqeləri barədə məlumatlandırıblar. Onlar həmçinin təhlükəsizliyin təmin edilməsi və avropalı tərəfdaşlarla qarşılıqlı fəaliyyətin zəruriliyini və gələcək birgə addımları ayrıca müzakirə ediblər.

Ukrayna prezidenti deyib ki, artıq bir gündən çoxdur ki, “dünya Rusiyadan irəli sürülən təkliflərlə bağlı mənalı cavab eşitmir”.

"Və bu, bir daha təsdiqləyir ki, müharibəni davam etdirməyə çalışan Rusiyadır və sülh prosesinin başlanmasını mümkün qədər gecikdirməyə çalışacaq. Ümid edirik ki, ABŞ-nın təzyiqi Rusiyanı müharibəni dayandırmağa məcbur etmək üçün kifayət edəcək", - o bildirib.

Zelenski qeyd edib ki, Ukrayna səmada və dənizdə sükuta hazırdır, lakin Amerika tərəfi yerdə də susmağı təklif edib.

"Ukrayna bu təklifi qəbul edir. Vacib məsələ nəzarətdir və biz nəzarətin texniki aspektlərini təşkil etməyə hazır olduğuna görə Amerika tərəfinə minnətdarıq", - o əlavə edib.

Xatırladaq ki, martın 11-də Səudiyyə Ərəbistanında keçirilən görüşdən sonra Ukrayna Rusiyanın da eyni addımı atacağı təqdirdə dərhal 30 günlük atəşkəsə razılaşıb.

E. KAMAL




Bölməyə aid digər xəbərlər