Rus donanmasını vurublar
Tarix: 01-08-2022 15:58 | Bölmə: Dünya
Rus donanmasını vurublar

Rusiya donanmasının Sevastopoldakı qərargahına silahlı uçuş aparatlları (SİHA) ilə hücum həyata keçirilib və nəzərdə tutulan donanma tədbirləri təxirə salınıb. Rusiya prezidenti Putin bundan dərhal sonra strateji sualtı qayıqların və döyüş gəmilərinin “Zirkon” kimi səsdən sürətli raketlərlə təchiz olunduğunu bildirib.

Reyting.az
xəbər verir ki, 2014-cü ildən Rusiyanın nəzarətində olan Krımın Sevastopol limanında hərbi donanma mərkəzinə SİHA hücumu zamanı 6 rus əsgəri yaralanıb.

Sevastopol qubernatoru bildirib ki, hərbi donanma bazasına hücumdan sonra şəhərdə bütün şənliklər dayandırılıb və şəhər əhalisindən evlərini tərk etməmək xahiş olunub.

Sevastopola hücum Rusiya prezidenti Vladimir Putinin doğulduğu Sankt-Peterburqda donanma günü münasibəti ilə keçirilən şənliklərə qatılmasından bir neçə saat əvvəl baş verib. Müdafiə Nazirliyinin təşkil etdiyi 326-cı Donanma Günü mərasimlərində iştirak edən Putini müdafiə naziri Sergey Şoyqu, Rusiya Hərbi Dəniz Qüvvələrinin Baş Komandanı Nikolay Evmenov və Rusiya Ordusunun Qərb Hərbi Dairəsinin Komandan müavini Vladimir Koçetkov müşayiət edib.

Dənizdə keçirilən paradda 40-dan çox döyüş gəmisi, kater və sualtı qayıq, 42 təyyarə və Rusiya Hərbi Dəniz Qüvvəsinin 3500 əsgərinin iştirak etdiyi bildirilir.

Mərasimdə Rusiya donanmasına müraciət edən Putin deyib ki, əsas məqam donanmanın imkanlarıdır.

"Donanmamız ölkəmizin sərhədlərində və dünya okeanının istənilən regionunda strateji vəzifələri uğurla və şərəflə yerinə yetirərkən suverenliyimizi və azadlığımızı pozmağa cəhd edən hər kəsə ildırım sürəti ilə cavab verməyə qadirdir. Onlar aktiv əməliyyatlara hazırdırlar və onların sahil, hava, sualtı qüvvələri və nəqliyyat vasitələri daim təkmilləşir”, - Putin bildirib.

Rusiya donanmasının inkişafı üçün yeni fərman imzaladığını deyən Putin, strateji sualtı qayıqları və döyüş gəmilərini “Zirkon” kimi səsdən sürətli raketlərlə təchiz etdiklərini bildirib.

Qeyd edək ki, bütün bunlar Ukraynanın ən varlı iş adamlarından birinin həyat yoldaşı ilə birlikdə Ukraynanın cənub-şərqində Mikolayevin güclü atəşə tutulması nəticəsində həlak olması kontekstində yaşanır. Xatırladaq ki, Ukraynanın taxıl kralı kimi tanınan 74 yaşlı Oleksiy Vadaturski ilə həyat yoldaşının qaldığı ev raketlə vurulub.

Digər tərəfdən, Ukrayna prezidenti Volodimir Zelenski Donetsk bölgəsində artan hücumlarından sonra əhalinin məcburi köçürülməsi əmrini verib. Donetsk və Luqanskın da daxil olduğu Donbasda hələ də yüz minlərlə insanın yaşadığını bildirən Zelenski, “Donetsk bölgəsini nə qədər çox insan tərk edərsə, Rusiya ordusunun öldürmək üçün vaxtı o qədər az olar. İmkanınız varsa, Donbasda döyüş bölgələrində qalanlarla danışın və onları ərazini tərk etməyin vacibliyinə inandırın”, - deyən prezident sakinlərə kompensasiya veriləcəyini də bildirib.






Bölməyə aid digər xəbərlər
{sape_links}{sape_article}