İranda seçkilər: namizədliklərin irəli sürülməsi davam edir
Tarix: 12-05-2021 11:38 | Bölmə: Dünya / Xəbər lenti
İranda seçkilər: namizədliklərin irəli sürülməsi davam edir

Bu gün İranda prezidentliyə namizədlik üçün sənədlərin qəbulunun 2-ci günüdür.

Reyting.az
“Təsnim”-ə istinadla xəbər verir ki, namizədliyin irəli sürülməsi üçün sənədlər Daxili İşlər Nazirliyində qəbul olunur.

Ölkənin tanınmış simaları arasında hələlik bir neçə nəfər iddiasını ortaya qoyub. Onlardan biri sabiq prezident Mahmud Əhmədinejaddır. Digər tanınan şəxs “Sepah”ın “Xatəmül-Ənbiya” qurumunun keçmiş müavini Səid Məhəmməddir. Ayətullah Xamnəinin hərbi məsələlər üzrə müşaviri və keçmiş müdafiə naziri Hüseyn Dehqan üçüncü şəxsdir.

Prezident seçkilərinə qatılacağını əvvəlcədən elan etmiş və namizədliyini hələ açıqlamamış siyasətçilərin növbəti günlərdə DİN-ə baş vuracağı bildirilir. Belə şəxslərdən biri İran parlamentinin sabiq spikeri Əli Laricanidir. Bu barədə “Mehr” agentliyinə Məclisin keçmiş rəhbərinə yaxın mənbələr məlumat verib.

“İbrahim Rəisinin namizədliyini nəzərə alaraq, seçkilərdə namizədliyimi irəli sürmək niyyətim yoxdur”. Bunu İslami Şura Məclisinin (parlament) hazırkı sədri Məhəmməd Baqir Qalibaf bildirib.

“Təsnim” agentliyi məhkəmə hakimiyyətinin rəhbəri İbrahim Rəisinin prezident seçkilərində iştirak məqsədi ilə qeydiyyatdan keçmək üçün yaxın günlərdə Daxili İşlər Nazirliyinə getməyi planlaşdırdığı barə məlumat verib.

Vəhdət Şurası bloku Rəisinin bu niyyətdə qətiləşdiyini bildirib.

İranın birinci vitse-prezidenti İshaq Cahangirinin də eyni niyyətdə olduğu iddia olunur.

Xarici işlər naziri Məhəmməd Cavad Zərifə gəlincə, mayın 10-da o, bir daha namizədlik barədə düşünmədiyini dilə gətirib.

Prezident seçkilərinə namizədlərin qeydiyyatı bu gündən başlayıb və 5 günədək davam edəcək.

Xatırladaq ki, İranda prezident seçkiləri iyunun 18-də keçiriləcək.

İranın Ali lideri Ayətullah Xamnəi prezident seçkiləri ilə əlaqədar bildirib: “İnsanların seçiminə qarışmıram. Keçmişdə namizəd olmaq istəyənlər məndən rəyimi soruşurdular, “nə dəstəkləyirəm, nə də müxalifəm” demişəm, yəni heç bir rəyim yoxdur, amma indi eyni şeyi söyləməyəcəyimi bildirirəm”.




Bölməyə aid digər xəbərlər
bütün xəbərlər
{sape_links}{sape_article}