Evi tikilmiş… - Nadir Qocabəyli yazır
Tarix: 31-10-2019 15:46 | Bölmə: Nadir QOCABƏYLİ
Evi tikilmiş…

Azərbaycanlılar bəlkə də dünyada evə ən düşkün olan xalqdır. Biz hətta bu məsələdə deyəsən bütün qan qardaşlarımızdan da irəlidəyik. Ötən yüzilin 90-cı illərinin sonunda Türkiyədə yaşayarkən orada əhalinin təxminən səksən faizinin kirayələrdə qaldığına xeyli təəccüblənmişdim. Qardaş ölkədə “evli” adam həqiqətən barmaqla göstərilən və həsədlə baxılan nadir olay idi. Amma mən Azərbaycanda hamını – bütün qonum-qonşunu, qohumları, tanış-bilişi ev-eşik sahibi görmüşdüm. Şəhərdə, yəni Bakıda da hər kəsin bir-iki, bəzən üç-dörd otaqlı evi olmasından xəbərdar idim. Mənim yaxın qohumlarımın hətta Fatmayı kəndində bağ evi də vardı. Kirayə qalanlar əsasən tələbələr idi, hətta aspirantlar, elmi işçilər, zavodlarda, digər müəssisələrdə işləyənlər belə ailə yataqxanaları, kommunal mənzillərlə təmin olunurdu.

Bu səhəri Birinci vitse-prezident Mehriban xanım Əliyevanın mərhum eks-prezident Əbülfəz Elçibəyin evini onun yeganə oğlu Ərturqut Əliyevin xahişi ilə təmir etdirməsi xəbəriylə açdıq. Hamı sevincək bu xəbəri paylaşır, mütləq əksəriyyət bu xeyirxah addımı alqışlayır. Hər bir media qurumu da rəqabətdə digərlərinə uduzmamaq üçün hadisəyə özünəməxsus rakursdan baxmağa çalışır. Mənim doğrusu, mərhum Elçibəyin belə bir böyük, üçmərtəbəli, geniş, hətta villa adlandırılması mümkün olan evindən xəbərim yox idi. Odur ki, bu xəbərə bir qədər təəccübləndim. Əgər cənab Prezidentin, yaxud birinci xanımın eks-prezidentin ailəsinə yeni mənzil bağışladığı xəbərini oxusaydım, zərrə qədər təəccüblənməzdim. Çünki son zamanlar ölkə başçısının, vitse-prezidentin əhalinin müxtəlif zümrələrinin, tanınmış elm, mədəniyyət, incəsənət xadimlərinin mənzil şəraitlərinin yaxşılaşdırılması ilə bağlı gördükləri işlər bizi vaxtaşırı sevindirir.

Amma Əbülfəz Elçibəyin üçmərtəbəli evinin olması məni həqiqətən təəccübləndirdi. Bildiyim qədəriylə mərhum sabiq Prezident hələ elmi işçi olarkən Bakıda birotaqlı bina evi ilə təmin olunub və Prezident olana qədər də həmin evdə yaşayıb. Prezident olduğu dövrdə də mənzil kimi dövlətə aid iqamətgahdan yararlanıb. Prezident vəzifəsini tərk etdikdən sonra Kələkidəki ata evinə gedib. Ancaq Kələkidən qayıtdıqdan sonra Bakıda harada yaşadığını doğrusu bilmirdim.

Əbülfəz Elçibəyi Azərbaycan xalqı korrupsiyaya bulaşmayan dövlət başçısı, təmiz adam, dürüst bir insan kimi tanıyır. Odur ki, belə böyük bir ev ala bilməsi istər-istəməz suallar doğurur. Ancaq çox keçmədən mənə bu evi ona dostlarının aldığını yazdılar. Tanrı belə “səxavətli” dostlardan hər kəsə qismət eləsin. Ancaq bir məsələ də var ki, Əbülfəz Elçibəy Bakıya qayıtdıqdan sonra yenidən fəal siyasətə qoşulmuş, hətta prezident olmaq iddiasını ortaya qoymuş, bu məqsədlə ABŞ-a belə səfər edərək, orada müəyyən dairələrlə görüşlər də keçirmişdi. Əgər ikinci dəfə hakimiyyətə gəlsəydi, yəqin ki, ona ev, maşın alan, başqa xərclərini ödəyən “dostların” borcunu qaytarmalı olacaqdı. Nəyin hesabına? Əlbəttə ki, aldığı maaşın deyil…

Mən, əlbəttə, bunları yazmaqla Əbülfəz Elçibəyi qaralamaq niyyəti güdmürəm, sadəcə siyasətdən, siyasətçidən kristal təmizlik umanların, yaxud ideal siyasi lider obrazı yaradanların bu məsələ üzərində bir daha düşünmələrini, düzgün qərar vermələrini istəyirəm.

Ancaq siyasətdə kristal şəxslər olub və var. Bu günlərdə digər bir eks-prezidentimiz Ayaz Mütəllibovun bir müsahibəsini dinlədim. Sən demə, Ayaz müəllim 1990-cı ilin Yanvar hadisələrindən sonra Moskvada olarkən o zaman artıq heç bir yerdə işləməyən Heydər Əliyev ilə görüşübmüş. Görüş zamanı Heydər Əliyev Ayaz Mütəllibova Azərbaycana, Bakıya qayıtmaq arzusunu bildirib. Mütəllibov da, özünün dediyinə görə buna etiraz etməyib. Bundan sonra Heydər Əliyev ona bildirib ki, qayıtmağa yeri yoxdur. Yəni Bakı şəhərində mənzili yoxdur. Ayaz müəllim buna xeyli təəccüblənib, hətta heyrət edib. “Necə ola bilər ki, respublikaya 13 il rəhbərlik edəsən, 5 il də SSRİ kimi nəhəng bir dövlətin rəhbərlərindən biri olasan, amma bu boyda ölkədə özünə bir ev götürməyəsən? Siz Bakının yarısından çoxunu mənzillə təmin etdiyiniz halda, necə ola bilər ki, öz eviniz olmasın…”

Bəli, Ayaz Mütəllibovun dilindən səslənən bu sözlər həqiqət idi. Böyük vəzifələr tutan Heydər Əliyev doğrudan da təmiz işləmiş, zərrə qədər korrupsiyaya bulaşmamış, heç vaxt rüşvət almamışdı. Dövlətin verdiyi mənzillərdə yaşadığından, əlavə ev almağa, yaxud tikdirməyə də ehtiyac duymamışdı. Əminəm ki, belə bir fikir Heydər Əliyevin ağlına belə gəlməyib.

O özü də Naxçıvanda yaşadığı zaman bu haqda bir neçə ötəri cümlə işlədib. Ancaq bəzi insanlar buna inanmaq istəmir, uzun illər ən yüksək vəzifələrdə işləmiş bir adamın var-dövlət toplamadığına, ev-eşik qurmadığına, övladlarına “gün ağlamadığına” inanmaqda çətinlik çəkirdilər. Bəziləri bu məsələdə sovet dövlətinin rolunu qabartmağa çalışsalar da, o dövrdə yaşamış adamlar bilir ki, korrupsiya da vardı, rüşvətxor məmurlar da. Ancaq Heydər Əliyev həmişə bu işlərdən kənarda olmuş, dövlətin verdiyi maaş və imtiyazlarla, müvəqqəti mənzillə kifayətlənmiş, korrupsonerlərə, rüşvətxorlara qarşı amansız davranmışdı.

Bildiyimə görə, Heydər Əliyev Naxçıvandan Bakıya qayıtdıqdan sonra da bir müddət qohumlarından birinin evində qalıb və Ali Sovetin sədri vəzifəsinə seçildikdən sonra dövlət onu mənzillə təmin edib.

Mən əminəm ki, ulu öndər Heydər Əliyev ikinci dəfə hakimiyyətə qayıdandan sonra da təmiz işləyib və təmiz yaşayıb. Dövlətin verdiyi maaşa və mənzilə qane olub. Nə xarici banklara pul yığıb, nə də saraylar, villalar tikdirib, alıb. Onun bütün tərcümeyi-halı şəffafdır və əminəm ki, orada ən kiçik bir korrupsiya elementinə yer yoxdur. Siyasi komandada kimlərinsə nəyləsə məşğul olmasının müxtəlif səbəbləri var və bu məsələ başqa bir araşdırmanın mövzusudur. Ancaq əminəm ki, o, xalqın, dövlətin maraqlarına zidd olan heç bir əmələ yol verməyib və şərait yaratmayıb.

Azərbaycanda Heydər Əliyevin adıyla bağlı çox şey – saraylar, mərkəzlər, parklar, muzeylər olsa da, mənim bildiyim qədəriylə, ev və ev muzeyi yoxdur. Onun evi bütün Azərbaycandır!скачать dle 10.5фильмы бесплатно

Müəllifin bütün yazıları - Nadir QOCABƏYLİ



Bölməyə aid digər xəbərlər
{sape_links}{sape_article}