Partiya sədri: “Bir sıra şəxslərin hakimiyyətdən gedəcəyini gözləyirəm” - Müsahibə
Tarix: 03-11-2019 15:26 | Bölmə: Müsahibə
Partiya sədri: “Bir sıra şəxslərin hakimiyyətdən gedəcəyini gözləyirəm”

Qulamhüseyn Əlibəyli: “Səlahiyyətlərindən sui-istifadə edib, xalqın sərvətini talayan şəxslər də hakim komandadan kənarlaşdırılacaqlar”

Azərbaycandakı kadr dəyişiklikləri ölkə müxalifətinin də əsas müzakirə mövzularından birinə çevrilib. Aydınlar Partiyasının sədri, keçmiş deputat Qulamhüseyn Əlibəyli Reyting.az-a müsahibəsində deyib ki, kadrların vaxtaşırı yerdəyişməsi rotasiya qaydası əsasında həyata keçirilir:

- Bu, özlüyündə müsbət hadisədir. Çünki bu və ya digər şəkildə təcrübəli kadrların irəli verilməsi, onların xalqa açıq olmaq istəkləri daha müsbət hadisə ola bilər. Hesab edirəm ki, son dövrlərdəki kadr dəyişiklikləri Prezidentin məmurları daha ciddi nəzarətə götürməsi, əvvəllər hakimiyyət və vəzifə imtiyazlarından istifadə edərək sərvət toplayan, habelə bu sərvətdən hakimiyyətə təzyiq vasitəsi kimi istifadə edən məmurların uzaqlaşdırılması, hakimiyyətə yeni idarəçilərin gətirilməsinə yol açır. Düşünürəm ki, bu dəyişikliklər düzgün addımlardır. Amma bunların nə dərəcədə xeyirli və müsbət olacağını zaman göstərəcək.

Mən belə kadr dəyişikliklərinə pozitiv yanaşıram və hesab edirəm ki, bu, yeni bir prosesin başlanmasına gətirib çıxara bilər.

- Kadr dəyişiklikləri ilə yanaşı struktur dəyişiklikləri də müşahidə olunur. Məsələn, Vergilər Nazirliyi və Əmlak Məsələləri Dövlət Komitəsi İqtisadiyyat Nazirliyinə birləşdirildi. Struktur dəyişikliyini necə qarşılayırsınız?

- Əslində struktur dəyişikliklərinə də normal yanaşmaq lazımdır. Fikrimcə, münasibətlər dəyişəndə və çoxşaxəli olanda daha çevik idarəetmə strukturunun yaradılması qaçılmaz olur.

Düzdür, əvvəllər də Əmlak Məsələləri Dövlət Komitəsi İqtisadiyyat Nazirliyinin tabeliyndə olub. Eləcədə antiinhisar qurumu. Sonradan bu qurumlar İqtisadiyyat Nazirliyindən ayrılıb. Səhv etmirəmsə, bu hadisə 2005-ci ildə baş verib. Ola bilsin, həmin dövrdə hesab olunub ki, bu qurumların müstəqil fəaliyyəti daha məqsədəuyğundur. Amma görünən odur ki, bu, özünü doğrultmadığı üçün həmin qurumlar yenidən nazirliyin tərkibinə daxil edildi. Vergilər Nazirliyinin də bura tabe etdirilməsi artıq ciddi hadisədir. Bu o deməkdir ki, İqtisadiyyat Nazirliyi artıq super nazirliyə çevrilir. Gələcəkdə Gömrük Komitəsinin də bu nazirliyin tərkibinə verilə biləcəyi haqda söz-sohbətlər var. Bu o deməkdir ki, yeni nazirlik iqtisadi bloka bütövlükdə nəzarət etmək imkanına malik olacaq. Hər halda struktur dəyişikliklərinin hansı nəticə verəcəyini, uğur və ya uğursuzluq gətirəcəyini bir müddət keçdikdən sonra görə biləcəyik.

Əgər xatırlayırsınızsa ilin əvvəlində müəyyən dəyişikliklər baş verib. Amma mən, bu günə qədər həmin dəyişikliklərin nəticəsini iqtisadiyyatda hiss etməmişəm. Ümid edirəm ki, bu dəyişikliklərin müsbət nəticəsi özünü göstərəcək.

- Sizcə kadr dəyişikliklərini xalq necə qarşılayır?

- Düşünürəm ki, xalq da bu dəyişikliklərdən razıdır. Müəyyən kadrlar var idi ki, onların vəzifədən kənarlaşdırılması müsbət hadisə oldu. Nəzərə alın ki, insanın gözü eyni şəxsləri eyni vəzifədə uzun müddət görməkdən yorulub. Cəmiyyət də bundan yorulub və yeni kadra ümidlə baxır. Bu mənada, ola bilsin ki, son dəyişikliklər cəmiyyətdə pozitiv qarşılanır.

- Yaşlı və təcrübəli kadrların hakimiyyətdən getməsi mənfi poseslərlə nəticələnə bilərmi?

- Mən bu prosesi çıxdaş adlandırmazdım. Onlar vaxtı ilə işləyiblər, indiki hakimiyyətə öz töhvələrini veriblər. Sadəcə, indi zaman dəyişir, dünya inkişaf edir. Buna uyğun olaraq yaşlı nəsil vəzifədən, siyasətdən getməli, müəyyən mənada istirahət etməlidir. Buna təbii baxmaq lazımdır. Kimlərinsə getməyi, yenilərinin gəlməyi bu baxımdan gözləniləndir. Həm də idarəetmə prosesi elədir ki, eyni adamların vəzifədə qalması həmin vəzifələrin imkanlarını məhdudlaşdırır. Ona görə də vaxtaşırı belə dəyişikliklərin olması müsbət hadisədir. Hesab edirəm, bu o halda mənfi nəticələrə səbəb ola bilər ki, yeni təyin edilən kadrlar özünü doğrultmasın. Bu ehtimalı nəzərə almaq lazımdır. Bu kadrların özünü doğrultmaması yeni siyasətin mənfi nəticələri olacaq.

- Kadr dəyişikliklərindən sonra islahatlara gediləcəyini gözləyirsinizmi?

- Hələlik inqilabi dəyişikliyi nəzərdə tutan islahatlar başlanmayıb. Təbii ki, yeni kadr gələndə öz sahəsində nələrisə dəyişmək istəyir. İndi cavan kadrlarda dəyişikliklərə meyllər var.

Ola bilsin ki, yaxın dövrlərə iqtisadiyyat sahəsində islahatların başlanmasını müşahidə edək. Hər halda yeni kadrların gəlməsi islahatların başlanğıcı kimi qiymətləndirilə bilər.

- Sıradan çıxan məmurlar təhlükə mənbəyinə çevrilə bilərmi?


- Mən onlardan təhlükə gözləmirəm. Onlar nə edə bilərlər? Hər halda zaman keçib, onlar öz görəvlərini başa vurublar. Vəzifədə olanda cəmiyyət və dövlətçilik üçün ciddi təhlükə törətməyiblərsə, bundan sonra da ciddi problem yarada bilməzlər. Uzaqbaşı gedib müxalifətin bir hissəsinə qoşula və ya onları maliyyələşdirməyə çalışa bilərlər. Amma bu, son nəticədə cəmiyyət üçün ciddi təhlükə yaratmayacaq.

- Hələ də hakimiyyətdə 70-80 yaşlı insanlar təmsil olunur və onların istefa vermək niyyəti də açıq hiss edilmir. Bu yaşda vəzifədən ikiəlli yapışmağı nə ilə izah edirsiniz?

- Vəzifə səlahiyyətlərində xeyli üstünlüklər və imtiyazlar var. Ola bilsin ki, bu imtiyaz və üstünlükləri itirmək istəmirlər. Siz nəzərə alın ki, bununla paralel qeyri-rəsmi imtiyaz və üstünlüklər də olur. Bu imtiyazlardan imtina etmək istəmirlər. Mən vəzifədən gedənləri nəzərdə tutmuram, amma indi vəzifədə işləyən xeyli sayda məmurlar var ki, onların xaricdəki sərvətləri açıqlanır. Mən hesab edirəm ki, bu, həmin vəzifənin verdiyi imtiyazlardan doğan sərvətlərdir. Azərbaycanın sərvətidir, bəlkə də qanunsuz yolla ölkədən çıxarılıb və harasa yatırılıb. Əgər bu gün məmurlara belə imkan yaradılıbsa, əslində onların baxışlarına görə, belələrinin vəzifədə qalmaq istəyi təbii qarşılanmalıdır. Amma bu doğru yanaşma da deyil.

- Belə məmurlar işlərini itirəcəkmi?

- Hesab edirəm ki, dövlət başçısı yeni siyasi kurs götürüb. Artıq bu kursun konturları görünür. Mən bir sıra şəxslərin hakimiyyətdən gedəcəyini gözləyirəm. Yəni səlahiyyətlərindən sui-istifadə edib, xalqın sərvətini talayan şəxslər də hakim komandadan kənarlaşdırılacaqlar. Əslində başqa cür ola da bilməz.

Reyting.azскачать dle 10.5фильмы бесплатно




Bölməyə aid digər xəbərlər
{sape_links}{sape_article}