21:05 / 12-07-2024
AFFA yeni qərarlar verib
Aktrisa: “Özümü olmalı olduğum yerdə hiss edirəm” - Müsahibə
Tarix: 23-10-2023 10:26 | Bölmə: Müsahibə / Mədəniyyət
Aktrisa: “Özümü olmalı olduğum yerdə hiss edirəm”

Nigar Mürsəlova: “Rol aldığım “Toy dəstgahı”nın mükafata layiq görülməsi Azərbaycan teatrının uğurdur”

Nigar Mürsəlova Dövlət Mədəniyyət və İncəsənət Universitetində aktyor-pedaqoq Ruslan İsmayılovun kursunda musiqili teatr aktyorluğu ixtisası üzrə təhsil alır. İstedadlı tələbəyə peşəkar teatrda çalışmaq, premyera həyəcanı yaşamaq, teleseriala çəkilmək, hətta beynəlxalq festivalda iştirak etmək sevinci də nəsib olub. Nigar xanım “YUĞ” Dövlət Teatrının aktrisası kimi bu yaxınlarda Qazaxıstanın Taldı-Kurqan şəhərində keçirilən “Biken” Beynəlxalq Teatr Festivalında iştirak edib.

Gənc tələbə-aktrisa ilə söhbətin əvvəlində festival təəssüratlarını öyrəndik.

- İlk dəfə idi ki, xarici ölkədə keçirilən festivalda iştirak edirdin. Hansı hissləri keçirdin?

- Öncə onu qeyd edim ki, “Biken” Beynəlxalq Teatr Festivalı Türk Dövlətləri Təşkilatının himayəsi ilə keçirilirdi. Bu faktın özü tədbirin əhəmiyyətini göstərir.



Məlum olduğu kimi, “YUĞ” Dövlət Teatrı festivala dahi Azərbaycan dramaturqu Cəlil Məmmədquluzadənin “Çay dəstgahı” əsəri əsasında hazırlanan “Toy dəstgahı” tamaşası ilə qatılmışdı. Fürsətdən istifadə edib teatrın direktoru İslam Həsənova, tamaşanın quruluşçu rejissoru Günay Səttara mənə inandıqlarına, bu maraqlı səhnə əsərində rol verdiklərinə görə minnətdarlığımı bildirirəm.

Açığı, aktrisa olmaq arzusu ilə yaşamamışam, baxmayaraq ki, uşaq vaxtı öz-özümə aparıcılıq edirdim, şeirlər deyirdim. Üstəlik, böyüdüyüm ailədə də daim önyarğı var idi. Sonra elə bir hadisə ilə üzləşdim ki, həyatım tam dəyişdi və “Artıq hər şey sənin öz əlindədir, çətinliyə qatlaş və özünü sübut”, - deyib imtahanlara ciddi hazırlaşdım, uğur qazanaraq tələbə oldum. İndi də “YUĞ” teatrının aktrisasıyam, həm böyük ustadların, həm də istedadlı gənclərin işlədiyi belə gözəl kollektivin bir üzvü olmaq sevindiricidir. Burda özümü olmalı olduğum yerdə hiss edirəm.



Keçirdiyim hissələrə gəlincə, Qazaxıstana gedəndə yol boyu həyəcan var idi. Oxucular yəqin məni anlayar, birinci dəfə idi ki, ölkə xaricinə çıxırdım, ilk dəfə təkcə çalışdığım kollektivi deyil, Azərbaycan teatrını təmsil etmək məsuliyyətini də hiss edirdim. Düşünürdüm ki, qazax tamaşaçılar, festivalda iştirak edən digər türkdilli ölkələrin sənətçiləri bizim “Toy dəstgahı”nı necə qarşılayacaq? Səhnəyə çıxan andan həyəcan yox oldu, özümü əmin, güvənli hiss etməyə başladım. Görünür səhnənin mistik bir qüvvəyə malik olması barədə deyilənlərdə həqiqət payı çoxdur. Şükürlər olsun ki, tamaşamız böyük maraqla qarşılandı. Festivalın təşkilatçıları, müxtəlif ölkələrdən gələn görkəmli teatr xadimləri, tənqidçilər tamaşamız, rejissor işi, aktyorlarımızın ifaları barədə xoş sözlər dedilər. Biz Bakıya döndükdən sonra öyrəndik ki, teatrımızın istedadlı aktrisası Günəş Mehdizadə “Toy dəstgahı”ndakı oyununa görə “Biken” Beynəlxalq Teatr Festivalının “Ən yaxşı aktrisa” üçün ayrılan mükafatına layiq görülüb.

Qazaxıstandakı festivalda belə demək mümkünsə, qazancım həm də o oldu ki, müxtəlif teatrların tamaşalarını izlədim, müqayisə, təhlil aparmaq fürsəti əldə etdim. Bu sənət yarışmasında çox maraqlı tamaşalar var idi, mənim də rol aldığım “Toy dəstgahı”nın mükafata layiq görülməsi həqiqətən də Azərbaycan teatrı adına uğurdur.

- Təhsil aldığın ali məktəbdə Vaqif İbrahimoğlu kimi böyük pedaqoq və rejissorun yaratdığı teatrın aktrisasına münasibət fərqlidir yəqin...

- Universitetin dördüncü kursunda oxuyanda “YUĞ” teatrının truppasına qəbul olundum. Müəllimim, özümə ustad saydığım Ruslan İsmayılov və kurs yoldaşlarım bu xəbəri eşidəndə çox sevindilər. Əlbəttə, incəsənət aləmində “YUĞ”un dəyərini yaxşı bilirlər, belə bir kollektivdə işə düzəldiyimə görə şanslı tələbə sayılıram.

- Bəs teatrda sənə qarşı münasibət necədir?

- Teatra gələndən bir neçə gün sonra “Toy dəstgahı” tamaşasında mənə rol verildi. Bildiyiniz kimi, əsər alleqorikdir, Samovar, Çaynik, Qaşıq və s. obrazlar var. Məşq prosesi, quruluşçu rejissor Günay xanımın söhbətləri, yaradıcı heyətdən tələblərin, aktyorların səhnədə göstərdikləri məni ovsunlamışdı, sehrli bir aləmə düşmüşdüm sanki. Teatrın daxilindəki ortam, kollektivdəki mehribanlıq və səmimiyyət elə ilk gündən məni valeh etdi. Hər an xoş, isti münasibət görən tələbə və gənc aktrisa üçün bundan gözəl nə ola bilər ki?



“YUĞ” vahid bir ailədir, bu heç də gəlişigözəl söz deyil. Bu ailənin bir üzvü olmaqdan qürur duyuram. Burada illərdir ki, yaradıcılıq uğurlarına imza atan, özlərini sənət aləmində təsdiqləmiş sənətkarlardan öyrənməyə çalışıram.

- Gənc aktrisanın gələcəkdə səhnədə oynamaq istədiyi obrazların yəqin ki, uzun bir siyahısı var...

- Tam səmimi deyim ki, belə bir siyahım yoxdur.

- Niyə?

- Çünki hər hansı bir məşhur əsərdəki obraz barədə xəyal qurmuram. Bu gün “YUĞ”un aktrisasıyam, “Toy dəstgahı”nda Qaşıq rolunu oynayıram, özü də sevə-sevə. Sabah rejissorlar hansı əsərlərdə obrazlar tapşıracaqlarsa rolları sevərək oynayacam. Mənim üçün oynadığım obrazı sevmək əsasdır.



Artıq teleseriala da dəvət almışam. Ölməz Cəfər Cabbarlının “Almaz” pyesi əsasında lentə alınan “Vətəndaş A” serialında Gülzar roluna çəkilirəm. Tamaşaçılar bu serialı İctimai kanaldan izləyə biləcəklər.

- Rolların sənə uğur gətirsin!

Etibar CƏBRAYILOĞLU
Reyting.az





Bölməyə aid digər xəbərlər
{sape_links}{sape_article}