Elçin Şıxlı: “Ermənistanın son təxribatında qlobal maraqlar var” - Müsahibə
Tarix: 17-07-2020 17:25 | Bölmə: Müsahibə
Elçin Şıxlı: “Ermənistanın son təxribatında qlobal maraqlar var”

Siyasi şərhçi deyir ki, Ermənistanın son təcavüz aktı böyük güclərin maraq dairəsindədir: “Bu, həm Türkiyəni vurmağa, həm də Azərbaycana barmaq silkələməyə hesablanıb. Bu saat heç kimin gözləmədiyi halda təxribatlar Azərbaycan istiqamətinə yönəldilir”

İyulun 12-də Azərbaycan və Ermənistan dövlət sərhədinin Tovuz rayonu istiqamətində baş verən hərbi qarşıdurmanın tam səngidiyini demək olmaz. Cəbhədən gələn xəbərlər göstərir ki, düşmən ordusu hər an sakitliyi poza, Azərbaycanın hərbi və mülki əhalisini yenidən hədəfə ala bilər.

Cəbhənin Qərb istiqamətində baş verən qanlı döyüşlər, bunun arxasında duran səbəb və məqsədlərlə bağlı Reyting.az-ın suallarını siyasi şərhçi Elçin Şıxlı cavablandırır.

- Elçin bəy, Azərbaycan-Ermənistan dövlət sərhədinin Tovuz rayonu ərazisində Ermənistan ordusunun qəfil hücumunun arxasında hansı məqsədlər dayana bilər?

- Bu barədə hər kəs danışır, öz fikrini deyir. Məsələn, Rusiyanın siyasi şərhçiləri deyirlər ki, bunu ABŞ, Fransa etdi, erməniləri qızışdırırlar. Hətta boş-boşuna iddia edənlər də olub ki, Türkiyə Ayosofiyanı məscidə çevirdi və buna görə Türkiyəni cəzalandırırlar. Sözsüz ki, bunlar sərsəm fikirlərdir. Əslində bu, Rusiyanın əməlidir. Qənaətimcə, Rusiya ermənilərə tapşırıq vermişdi, erməniləri də bunu həyata keçiriblər. Məncə, bu iddia sonradan təsdiqini tapdı.

- Azərbaycan-Rusiya münasibətləri hazırda yüksək səviyyədədir. Ruslar niyə erməniləri qızışdırsın ki?

- İndi ABŞ Rusiyaya sanksiyalar tətbiq edib. Avropa Birliyi də Rusiyaya sanksiyalar tətbiq edir. Breksit prosesindən sonra İngiltərə də bu sanksiyalara qoşuldu və əlavə olaraq özünün sanksiyalarını tətbiq etməyə başlayıb. Həmçinin, rusların “Şimal Axını-2” layihəsinin tikilməsinə imkan verilmədi. Bu layihə sonuncu 60-100 kilometrinin tikilməsinə az qalmış sanksiyalar altında salındı. Beləcə, Rusiyanın trans-boru kəmər xətləri hələ ki, o istiqamətdə işləyə bilmir.

Rusiyada konstitusiya dəyişikliyi edildikdən sonra cənab Putin ölkə daxilində “səliqə-səhman”a başladı. İndi Rusiyada ən böyük problemlərdən biri Xaborovski vilayətində separatçı çağırışlardır. Oranın qubernatorunu qətl işinin təşkilində ittiham edərək həm işdən çıxardılar, həm də həbs etdilər. Xaborvski sakinləri isə ayağa qalxaraq qubernatorunu müdafiə edir və deyir ki, zamanında Uzaq Şərq Respublikası olub, indi biz onu yaradırıq.

Putin Belarusu Rusiyanın tərkibinə qatmaq istədi, bu da alınmadı. Sonradan Belarus qazla təhdid edildi, Qərbdən Minskə dəstək verildi. İndi Belarus Rusiyadan nə neft, nə də qaz alır. Alsa da, az miqdarda...

Ukrayna ilə münasibətlər olduqca gərgindir, Moskva istədiyinə nail ola bilmir. Hətta Normand formatında görüşlərdə deyir ki, Donbası verirəm, əvəzində sanksiyaları üzərimizdən götürün. Amma hələ ki, Krımdan danışmır.

Bu nöqtədə Türkiyə-Rusiya münasibətlərini də unutmamalıyıq. Suriyada toqquşdular, Liviyada əməlli-başlı üz-üzə gəldilər. Və nəticə olaraq Türkiyə Rusiyaya yerini göstərdi. Belə bir şəraitdə sözsüz ki, diqqəti daxili problemlərdən yayındırmaq istəyirlər, amma eyni zamanda da slavyan xalqları istiqamətində bir şey alınmır, Baltikyanı ölkələrə də girə bilmirlər. Odur ki, bu saat heç kimin gözləmədiyi halda təxribatlar Azərbaycana yönəldilir. Bu təxribata baxmayaraq biz düşmənlə döyüşdük, döyüşürük və döyüşəcəyik də. Amma burada məhəlli və Azərbaycan-Ermənistan səviyyəsindən yuxarıda olan maraqlar var. Söhbət qlobal maraqlardan gedir. Məsələn, Azərbaycan ərazisindən Rusiyanın bütün boru xətlərinə alternativ marşurutlarımız var. Yəni Rusiyaya ehtiyac olmadan bu boru kəmərləri Gürcüstan və Türkiyə üzərindən dünyaya çıxır. Odur ki, son təxribat həm Türkiyəni vurmağa, həm də Azərbaycana barmaq silkələməyə hesablanıb. Eyni zamanda Ermənistana mesaj verilir ki, özünü yaxşı aparmasan Azərbaycana mane olmayacağıq və cavabını verəcək.

- Düşünürsünüz ki, məqsəd iqtisadi maraqlardır?

- Bizim Azərbaycan Dövlət Neft Şirkəti artıq Bakı-Novorossiyski xətti ilə qaz ötürməyə başladı. Ayının oyunu armuda görə idi. Bütün bunları nəzərə almalıyıq. Daxildə nə baş verdiyini, Novorossiyski xəttini bərpa etməklə Rusiyadan nə aldığımızı bilmirəm. Fikrimcə, bunu hadisələrin gələcək inkişafı göstərəcək.

- Siz, Tovuz istiqamətində baş verən döyüşlərə daha geniş aspektdən yanaşdınız. Bəs bunun nəticələri necə ola bilər?

- Məncə, hələlik bu haqda konkret fikir bildirmək tezdir. Hələlik nəticə budur ki, gərgin qarşıdurma dayandı.

- Axı hazırda da Tovuzda vəziyyət gərgindir...

- Qeyd edirəm ki, Novorossiyski borusu işə düşdü. Sadəcə, bunun əvəzində Rusiyadan nə almışıq, bax, bunu bilmirəm. Hesab edirəm ki, erməni özbaşına heç vaxt belə bir şey etməzdi. Yəni ona nəsə vəd edilməsə, heç nə etməzdi. Çünki gerçək durumdan, Azərbaycan ordusunun imkanlarından məlumatlıdır.

Ruslar son məqamlarda hətta Türkiyə prezidenti Ərdoğanın və Müdafiə naziri Hulusi Akarın dediklərindən də təşvişə düşdü. Sözsüz ki, qardaş ölkənin Ermənistanla sərhəddə aviasiya və dronları ayağa qaldırması da səsləndirildi. Nəticədə Rusiya Ermənistanda olan öz qoşun hissələrini Türkiyə sərhədində bir qədər də artırıb.

Amma nəticə haqqında indi bir söz demək mümkün deyil. Hesab edirəm ki, bu xəmir hələ çox su aparacaq.

- Qərb cəbhəsində olan gərgin durumun Qarabağ cəbhəsinə keçirilməsi imkanlarını necə qiymətləndirirsiniz?

- Belə bir addım genişmiqyaslı müharibə deməkdir. Bu müharibə üçünsə əvvəlcədən hazırlıq olmalıdır. Pandemiya dövründə belə bir tədbirə getmək bir qədər çətindir. Niyə? Çünki iqtisadiyyat xeyli zəifləyib, neftin qiyməti enib. Ümumən dünyada dərin bohran var. Sözsüz ki, Ermənistanın vəziyyəti bu baxımdan bizdən üç dəfə pisdir. Belə vəziyyətdə nəsə bir şey etmək bir qədər çətindir. Odur ki, mən bir söz deməkdə çətinlik çəkirəm. Hərçənd, biz Tovuz istiqamətində sərhədin o tərəfinə gedə bilmərik. Amma Tovuz və Qazax eyni bölgədir. Tovuz cəbhəsində yaranan gərginlik zamanı Qazax istiqamətinə də bir neçə mərmi atılıb. Baxın, biz daima danışırıq ki, Dağlıq Qarabağ və ətrafdakı 7 rayon işğal edilib. Amma Qazax rayonunun 7 kəndi bu saat işğal altındadır. Davanı başlayıblarsa, lap yaxşı. Biz danışıqlar prosesində Qazaxın 7 kəndi haqqında da fikirlərimizi deməliyik. Bu saat bəlkə də məqamdır ki, Qazaxın 7 kəndi istiqamətində hərəkət ola bilər. Bu kəndlər bizimdir. Biz burada Ermənistan torpaqlarına girmirik. Bu kəndlərin təxminən iki və ya üçü neytral ərazidir, orada heç kim yaşamır. Yerdə qalanlarını isə ermənilər dağıdıb. Hər halda mən mülahizələrimi deyirəm. Bu istiqamətdə nəsə etmək olardı. Amma o da bəllidir ki, belə addımlar üçün əvvəlcədən hazırlıq və planlar olmalıdır.

Mənim anladığım budur ki, biz, ümumiyyətlə aqressiv bir şey etmək niyyətində deyilik. Amma ermənilər belə həyasızlığa gedirlərsə, deməli, bu barədə daha geniş düşünməliyik.

- Danışıqlar prosesinin perspektivi necə ola bilər?

- Danışıqların heç bir mənası yoxdur. Məmmədyarov on ildən çox danışıq apardı, sonra da bəlli oldu ki, viza üçün pul alınırmış və s. İndi yeni nazir təyin edilib, baxaq görək o nə edəcək…

Reyting.az
скачать dle 10.5фильмы бесплатно




Bölməyə aid digər xəbərlər
bütün xəbərlər
{sape_links}{sape_article}