23:11 / 18-03-2024
Ukrayna ordusu geri çəkilir
Demokratiya kabusu
Tarix: 22-06-2019 13:49 | Bölmə: Nadir QOCABƏYLİ
Demokratiya kabusu

Vaxt vardı Türkiyədə millət özünü Ərdoğandan ötrü öldürürdü. O zaman mən də Türkiyədə idim. O, əsl qəhrəman idi. Onu bir mitinqdə Türkiyə iqtiqlal marşının müəllifi, Türkiyədə çox sevilən Mehmet Akif Ərsoyun şeirindən bir sətir ("Məscidlər qışlamız, minarələr süngümüz...) söylədiyinə görə həbs etmişdilər.

Sonra o, İstanbul meri oldu. Yaxşı işlər gördü deyə (belə deyirdilər), nüfuzu daha da artdı. Oturub-durduğum türk gənclər mənə "abi, Türkiye Atatürkten sonra böyle bir lider görmedi", - deyirdilər.

AK Parti seçkilərdə qalib gələrək uzun illərdən sonra tək iqtidar oldu, amma Ərdoğanı baş nazir olmağa qoymadılar. Baş bakan vəzifəsinə formal olaraq yumşaq xarakterli Abdullah Gül oturduldu. Bir müddətdən sonra bu maneə də aşıldı, ancaq Ərdoğanın prezident olmaq yolu da hamar olmadı...

İndi eyni şeylər Əkrəm İmamoğluya münasibətdə baş verir. Bircə fərq var: 20 il qabaq Rəcəb Tayyib Ərdoğanın simasında sağçılar (dindarlar) təqib olunurdu, indi yazılanlara görə, təqib edənlər özləri (laik solçular) sıxışdırılır.

O vaxt İstanbul universitetinə başıbağlılar buraxılmırdı, universitetin rektoru Kamal Aləmdaroğlu milli düşmən elan olunmuşdu, indi hicabsızların təqib olunmasıyla bağlı informasiyalar yayılır.

Tutaq ki, gənc Ərdoğanın keçdiyi bütün prosedurları İmamoğlu da yavaş-yavaş keçdi; əvvəlcə həbs olundu (deyilənə görə, artıq Ərdoğan onu hədələməyə başlayıb), sonra mer, baş nazir və prezident oldu və 20 il də o hakimiyyətdə qocaldı, bu zaman ərzində nüfuzdan düşdü, sağ mühafizəkarlar yeni bir gənc ortaya çıxardılar...

Biz buna demokratiya, demokratik mübarizə deyirik. Çox əcəb, olsun demokratiya. Yaxşı, bəs bu demokratiyada Türk xalqının, sadə insanların, əhalinin qazancı nədir? Mən çoxdandır getmirəm, Türkiyədə zamanın gətirdiyi dəyişiklikləri çıxsaq, elə bir ciddi inkişaf varmı? Ərdoğanın tərəfdarları var, əleyhdarları yoxdur deyəcək. Amma 20 il əvvəl də beləydi.

O vaxt da, yəni solçu Ecevitin, qərbçi Çillərin, Yılmazın idarə etdiyi Türkiyədə də inflyasiya baş alıb gedirdi, əhali evsizlikdən, maaş azlığından, yoxsulluqdan əziyyət çəkirdi, indi də elədir. Əminəm ki, 20 il sonra da eyni şey olacaq...

Çünki Türkiyə xalqı öz potensialını elmə, texnologiyaya, iqtisadi və mədəni tərəqqiyə yox, məhz demokratiyaya sərf edir və bu demokratiya onu elə yorur ki, başqa şeylərə vaxtı qalmır. Bütün enerjisini bir-birini tənqid və təhqir etməyə, cürbəcür mənasız seçki dartışmalarına sərf edən millətin başqa nəsə etməyə heyi-hərəkəti qalarmı? Qalmaz!

Qərbin istədiyi də məhz budur. Bizi zahiri demokratiya ilə yormaq, amma onun altında, "pərdə arxasında" nələrin yatdığı haqda danışmağa qoymamaq, danışanların səsini batırmaq, dilini kəsmək, onlara hər cür mane olmaq.

Ərdoğan ABŞ-ın xeyir-duası ilə hakimiyyətə gəlsə də (radikal, Qərbə sərf etməyən mühafizəkar islama qarşı Fətullah Gülənin yumşaq, idarə olunan islam layihəsi), sözəbaxan lider olmadı. Möhkəmlənən kimi istismarçılara, işğalçılara öz yerlərini göstərməyə başladı. ABŞ belə bir adamı idarə edə biləcəyini düşünməklə səhvə yol vermişdi. Odur ki, onu aradan götürmək lazım idi. Çevriliş cəhdi baş tutmadı. Embarqolar, inflyasiya da kömək eləmədi. Odur ki, CHP-yə dəstək verməyə başladılar və indi də Əkrəm İmamoğlunu ortaya atıblar. Sizi inandırım ki, bu adamın soyadını da Ərdoğanın elektoratını ələ almaq üçün seçiblər.

Bizim demokratşüvənlərin də onu əziz qardaşları kimi müdafiə etməsi layihənin Qərbdən güclü dəstək aldığına tutarlı dəlillərdəndir. Çünki Azərbaycanda bir ovuc adamın eyni anda eyni şeyi xorla oxuması, birmənalı olaraq Qərb təlimatıdır.

Dünyada bir kabus dolaşır - Demokratiya kabusu!

Müəllifin bütün yazıları - Nadir QOCABƏYLİ



Bölməyə aid digər xəbərlər
{sape_links}{sape_article}