16:55 / 24-02-2021
CBC TV-nin avtomobili aşıb
Xocalının sabiq icra başçısı: “Xocalının azad olunan kəndləri Xocalıdan daha çox Şuşaya yaxındır” - Müsahibə
Tarix: 07-11-2020 17:53 | Bölmə: Müsahibə / Slayd
Xocalının sabiq icra başçısı: “Xocalının azad olunan kəndləri Xocalıdan daha çox Şuşaya yaxındır”

Elman Məmmədov deyir ki, 28 ildən sonra doğulduğum yurduma gedib, ocağımı yandıracağam. Bundan ali məqsəd, hiss və arzu ola bilməz

Azərbaycan Ordusu 42 gündür ki, ölkənin ərazi bütövlüyünü təmin etmək məqsədilə uğurlu hərbi əməliyyatlar keçirir.

Xocalı şəhərinin sabiq icra başçısı, Milli Məclisin üzvü Elman Məmmədov Reyting.az-a müsahibəsində deyib ki, Azərbaycan Ordusu hərbi əməliyyatları çox yüksək səviyyədə icra edir:

- Ordumuzun sentyabrın 27-dən başlatdığı əks-hücum əməliyyatları hərb elminin ən müasir naliyyətlərinə əsaslanır. Bu gün ordumuz mövcud hərbi texnologiyanın ən müasir avadanlıqlarından istifadə edir, özü də yüksək səviyyədə. Bunu nəinki biz, həm də dünyanın tanınmış hərbi mütəxəssisləri deyirlər. Hətta elan edirlər ki, Azərbaycan Ordusunun bu təcrübəsindən istifadə olunmalı, öyrənilməlidir.

Mən ordumuzun naliyyətləri ilə fəxr etməklə yanaşı ordumda xidmət edən hər bir əsgər və zabiti bağrıma basıram, öpürəm, onlara canım qurban olsun.

- Artıq Xocalının da bəzi kəndləri işğaldan azad edilib. Yerli şəraiti bilən şəxs kimi deyə bilərsinizmi bunlar hansı satrateji əhəmiyyətə malikdir?

- Mən hərbçi deyiləm, amma 1988-ci ildən 1992-ci ilin ortalarına qədər döyüşlərdə olmuşam. Ərazini yaxşı tanıyıram. Bu gün Azərbaycan Ordusu bir deyil, bir neçə istiqamətdə əməliyyat keçirir. Yəni həm şimaldan, həm cənubdan, həm də digər istiqamətlərdən planlaşdırılan, əlaqələndirilən və mərkəzdən idarə olunan yüksək səviyyəli əməliyyatlar keçirir və uğur qazanır. Bunlar kiminsə istəyi ilə olan məsələ deyil. Yəni “hansısa komandir istədi və biz irəli getdik”, - məsələsi deyil. Burada bütün əməliyyatlar mərkəzdən, həm də yüksək səviyyədə idarə olunur. Uğurlarımız bundan ibarətdir.

Müharibədə silah-sursat, əsgərin əhval-ruhiyyəsi çox vacib amillərdir. Amma ən vacib bir məqam da var. Bu gün döyüş və hücum əməliyyatlarında ordumuz ən müasir texnologiyadan istifadəni yaxşı bacarır. Düşmən buna görə aciz qalıb və hələ də baş çıxara bilmir ki, son bir ayda nə olub. Hesab edirəm ki, bu əməliyyatların sonu böyük qələbə ilə bitəcək.

- Elman müəllim, hazırda Azərbaycan Ordusu Xocalının hansı istiqamətindədir?

- Siz də xəritəyə baxsanız müəyyən məsələləri görə bilərsiniz. Xocalının kəndləri çoxdur. Şərq istiqamətindən - Ağdam tərəfdən Xocalının mərkəzinə hələ təxminən 30 kilometr məsafə var.

Bir neçə saat əvvəl Ali Baş Komandan Xocalının işğaldan azad edilən kəndləri haqqında məlumat verdi. Qeyd edim ki, bunlar dağ kəndləridir. Bu kəndlərdən Xocalının mərkəzinə hava yolu yaxındır, amma quru yolla təxminən 15-16 kilometr məsafədir. Mən Xocavənd istiqamətindən nəzərdə tuturam.

- Sizcə, Şuşa ətrafında nə baş verir?

- Əslində indi xəbəri çıxan və azad edilən Xocalının kəndləri Xocalıdan daha çox Şuşaya yaxındır.

- Amma Şuşa ilə bağlı da ziddiyyətli məlumatlar gəlir. Sizdə bununla bağlı son məlumat nədən ibarətdir?

- Mən də, baxıram, oxuyuram. Çoxları sosial şəbəkələrdə yazırlar, məlumatlar verirlər. Amma biz bir məsələyə ciddi riayət etməliyik. Müdafiə Nazirliyinin rəsmi məlumatı olmadan kimsə özfəaliyyətlə məşğul olmamalıdır. Müdafiə Nazirliyinin yaydıqlarından fərqli məlumat və informasiyalar verməməlidir. Bu, bizim hərbi əməliyyatların gedişinə zərər verə, hətta canlı qüvvələrimiz arasında tələfatlara səbəb ola bilər. Mən anlayıram, bəzən sevincdən, qürurdan doğaraq nəsə deyilir, paylaşmalar olur. Hesab edirəm ki, bu, bizim ümumi işimizin zərərinədir. Hərbi sirri qoruyub saxlamaq məsələsi var.

Bu gün texnologiya elə inkişaf edib ki, hər paylaşım, çəkiliş və ya zəngin yerini düşmən tərəf müəyyən edə və həmin nöqtələrə zərbələr endirə bilər. Odur ki, bu haqda ciddi düşünməli və nəticələr çıxarmalıyıq. Və buna əməl etməyi bacarmalıyıq. Rəsmi məlumat olamadan heç kəs bu barədə məlumat vermək hüququna malik deyil.

- Amma erməni mənbələri də qeyd edirlər ki, Şuşa ətrafında döyüşlər gedir...

- Deyirlər. Görünür təkzibedilməz faktlardır. Ancaq biz Müdafiə Nazirliyinin rəsmi məlumatlarına istinad edirik. Başqa mənbələrə istinad etmək doğru olmazdı.

- Ermənilərin hərbi imkanlarını necə qiymətləndirmək olar?

- Ermənistanın imkanları tükənir. Təminat demək olar ki, pisdir. Sentyabrın 27-nə qədər emənilərin təminatı haradan idi? Sözsüz ki, şimaldan ya təyyarələrlə, ya da Gürcüstan ərazisindən yollarla gətirilirdi. Gürcüstan da özünün əməkdaşlıq sədaqətini göstərdi və ərazisindən hərbi yüklərin daşınmasını qadağan etdi.

Düzdür, indi humanitar yardım adı altında sərnişin təyyarələri ilə Rusiya və ya Fransadan müəyyən təminatlar olur. Amma əsas təminat yolu İrandan idi. Bu günlərdə İranın Ali Dini rəhbəri, prezidenti və başqa rəsmi şəxsləri bəyanat verdilər ki, Azərbaycanın ərazi bütövlüyünü dəstəkləyirlər, Azərbaycan bu məsələdə haqlıdır, onun ərazi bütövlüyü təmin edilməlidir. Mən arzu edirəm ki, bu bəyanat sözdə olduğu kimi əməldə də təsdiqini tapsın. Yəni İrandan müxtəlif yollarla Ermənistana gələn muzdlular dəstəsi, hərbçilər üçün ərzaq, yanacaq, silah-sursat təminatı dayandırılsın. Belə olduqda Ermənistana göydən silah-sursat, ərzaq, yanacaq tökülməyəcək ki...

Hazırda ordumuz Laçın-Şuşa yoluna nəzarət edir. Əməliyyatların başlandığı ilk günlərdə ordumuz Vardanes və Kəlbəcərdən keçərək Ağdərəyə gələn yola nəzarəti təmin etməyi bacarıb. Belə olduqda Dağlıq Qarabağda qalan tör-töküntünün təminatı da tükənir. Bunlar çıxılmaz vəziyyətdə qalıblar. İki yolları qalacaq. Ya silahlarını yerə qoyub təslim olacaqlar, ya da sonuncu silahlı şəxsə qədər hamısı məhv ediləcək.

- Xocalının kəndlərinin azad edilməsi, şəhərin azad olunmasının real olması Sizdə hansı təəssüratlar yaradır?

- Mənim üçün bunu dilə gətirib ifadə etmək həddən artıq çətindir. Bundan ali və müqəddəs hiss ola bilməz. Mən, 28 ildən sonra doğulduğum yurduma gedib, ocağımı yandıracağam. Bundan ali məqsəd, hiss və arzu ola bilməz.

Reyting.az




Bölməyə aid digər xəbərlər
{sape_links}{sape_article}