Vahid Əhmədov: “Sərhəd məsələsinə birdəfəlik son qoyulmalıdır” - Müsahibə
Tarix: 20-05-2021 17:09 | Bölmə: Müsahibə
Vahid Əhmədov: “Sərhəd məsələsinə birdəfəlik son qoyulmalıdır”

Milli Məclisin üzvü: “10 noyabrda razılaşma imzalanıb. Müqavilənin bəzi müddəalarını yerinə yetirmirlər. Mən Zəngəzur dəhlizini nəzərdə tuturam”

Azərbaycan növbəti dəfə saxta ittihamlarla üzləşib. Vaxtilə işğal olunmuş sərhədboyu ərazilərin azad edilməsi və Azərbaycanın Ermənistanla dövlət sərəhəddinin bərpası istiqamətində görülən hüquqi işlər ermənilərə indi də bu məsələ ətrafında əsassız hay-küy salmaq fürsəti verib. Ermənilər müxtəlif dövlət başçılarına və beynəlxalq təşkilatlara müraciətlərində hətta Azərbaycanı işğalçılıqda ittiham etməkdən də çəkinmirlər.

Baş nazirin sabiq müavini, Milli Məclisin deputatı Vahid Əhmədov Reyting.az-a müsahibəsində Azərbaycan-Ermənistan sərhəddində baş verən son hadisələrdən danışıb:

- Sərhədlər müəyyən edilməli, tərəflər dövlət sərhəddinin haradan keçdiyini bilməlidir. Hesab edirəm ki, dövlət sərhədləri müəyyən edilib, biz bəzi istiqamətlərdə bizim olanı götürmüşük, amma götürülməyən hissələr də var. İndi əsas istiqamət Zəngilan, Qubadlı, Laçın və Kəlbəcərdə dövlət sərhəddinin müəyyən olunmasıdır.

Bəli, ermənilər bu mərhələdə sərhədlərin delimitasiyasına mane olur. Ən azından səs-küy qaldırmaları bunu göstərir. Lakin bunun da hüquqi əsası yoxdur. Çünki ortada sənəd, xəritə var. Səhv etmirəmsə, SSRİ zamanı təsdiqlənmiş sənədlər ortadadır. Biz bu sənədlər çərçivəsində öz işimizi görürük. Buna Ermənistan da razı olmalıdır, sərhəd məsələsinə birdəfəlik son qoyulmalıdır.

O ayrı məsələdir ki, indi Ermənistan növbədənkənar parlament seçkilərinə hazırlaşır. Onlar sərhədlərin delimitasiyası məsələsindən sui-istifadə edir, aləmə car çəkirlər ki, Azərbaycan Ermənistan ərazilərinə daxil olub və s. Ermənistan ərazisinə daxil olmaqdan söhbət gedə bilməz. Bu, Azərbaycana lazım da deyil. Həm də bu prosesdə Rusiya da hansısa formada iştirak edir. Dövlət sərhədləri müəyyən olunmalıdır ki, biz işimizi bilək.

Azərbaycan güclü dövlətdir. Çalışmalıyıq ki, bu sərhədlərdə bizim texnikamız, hərbi ləvazimatlarımız işlək vəziyyətdə olsun. Bu istiqamətdə də işlər görülür.

Delimitasiya və demarkasiya bütün sərhəd boyu aparılmalı və başa çatdırılmalıdır.

- Ermənilər niyə sərhədlərin müəyyənləşdirilməsinə etiraz edir? Axı onlar 10 noyabrda imzalanan üçtərəfli razılaşmada həm də bununla bağlı öhdəlik götürüblər...

- Ermənilər indiyə qədər nəyə etiraz etməyib ki? Bizim xeyrimizə olan hər şeyə etiraz edirlər. Elə bilirlər ki, buralar onların dədə-baba torpağıdır.

Ötən gün erməni politoloq Qriqoryanın yazısını oxuyurdum. Deyir, “yaxşı olardı ki, Ermənistanın paytaxtını Soçi və ya Krosnadarda edək. Çünki Abxaziya, Çeçenistan, Dağıstan da bizimdir”.

Qriqoryan əlavə edir ki, sonra “Böyük Ermənistan” yaradaq, Gürcüstan vasitəsilə Qara dənizə çıxaq. Bununla da ideyamızın əhəmiyyətli hissəsini yerinə yetirək.

Bunlar xəstə təfəkkürlü insanlardır. Başa düşmürlər ki, Azərbaycan dövlət, dövlət başçısı və ordu olaraq sözünü dedi. Millət olaraq birdəfəlik elan etdi ki, bu torpaqlar Azərbaycana məxsusdur. Beləcə, torpaqlarımızı işğaldan azad etdik. Ərazilərimizi azad etmişik və indi orada sərhədlərimizi qururuq ki, nəyin bizim olub-olmadığını bilək. Ermənilərin tullanıb-düşməsi ilə deyil ki...

Bəli, ermənilərin xaricdən ciddi dəstəyi, onlara kömək etmək istəyən qüvvələr var. Bəzi qonşu ölkələr, eləcədə Fransa və digərləri. Ancaq bunlar boş şeylərdir.

Azərbaycan 1990-cı illərin Azərbaycanı deyil. Azərbaycan qüdrətli dövlətdir, güclü ordusu, son modern silah-sursatı var. Odur ki, indi ermənilərin hay-küyü işlərinə yaramayacaq. Ortada xəritə və sənəd var, ona uyğun addımlar atılacaq.

- Amma Ermənistan Müdafiə Nazirliyi ötən gün məlumat yayıb ki, qurum guya Azərbaycan tərəfindən götürülən ərazilərə nəzarəti bərpa etmək üçün bütün hüquqları özündə saxlayır...

- Bu növbəti şantajdır. Başqa cavabı yoxdur. Amma aydındır ki, Ermənistan ordusu darmadağın edilib.

Dünən internet resurslarında erməni ordusuna baxırdım. 17, 18 yaşlı uşaqlara təlim keçirlər.

Azərbaycan ordusu Ermənitanın uzun illərdir ki, mif kimi təqdim etdiyi ordunu dağıtdı, məğlub etdi. Dövlət başçımız da birdəfəlik bəyan etdi ki, heç bir statusdan söhbət gedə bilməz. Status faktiki olaraq zibilliyə atılıb və Azərbaycan ərazi bütövlyünü təmin edib.

Düzdür, indi Xankəndi, Xocavənd, Ağdərə və Əsgəranda rus sülhməramlıları var - əgər buna sülhməramlı demək mümkündürsə. Onlar da müəyyən vaxtdan sonra ərazilərimizi boşaldacaq və Azərbaycan o hissəni də nəzarəti altına alacaq. Yəni burada problem yoxdur.

Qənaətimcə, ermənilər süni yolla problemlər yaradır və istəyirlər, dünyaya çatdırılsın ki, biz yenə də vuruşacağıq. Əslində vuruşmağa nə bazaları, nə canlı qüvvələri, nə də texnikaları var.

İkincisi, 10 noyabrda razılaşma imzalanıb. Müqavilənin bəzi müddəalarını yerinə yetirmirlər. Mən Zəngəzur dəhlizini nəzərdə tuturam. Dövlət başçımız da açıq bəyan etdi ki, istəsələr də, istəməsələr də dəhliz açılacaq.

Nikol Paşinyan çox da deyir ki, biz dəhliz məsələni müzakirə etmirik. Bu kimi açıqlamalara əslində Rusiya reaksiya verməlidir. Rusiya da bəyan edib ki, kommunikasyalar açılmalıdır. Rusiya Xarici işlər naziri Sergey Lavrov da regiona son səfəri zamanı 10 noyabr sazişinin yerinə yetirilməli olduğunu bir daha təkrarladı.

Paşinyan seçkilərə gedir. Seçki öncəsi onlara nə sərf edirsə, onu da deyirlər. Bunların hamısı daxili aditoriyaya hesablanan açıqlamalarıdır. Yəni müvəqqəti xarakter daşıyır.

Əlbəttə, biz ayıq-sayıq olmalı, ordumuzu daha da gücləndirməliyik. Eləcədə silah-sursatımızı daha müasir səviyyəyə çatdırmalıyıq. Eyni zamanda xalqla dövlət bir yerdə olmalıdır. 44 günlük müharibədə olduğu kimi.

Nəhayət, bizim 44 günlük qələbəmizi bir sıra dövlətlər həzm edə bilmirlər. Onlar inanmırdılar ki, biz Şuşa şəhərini, Hadrutu işğaldan azad edə bilərik. Düşünürdülər ki, Azərbaycan ordusu zəifdir, xalq dövlətlə bir olmaya bilər. Amma xalqımız göstərdi ki, dövlətlə, Ali Baş Komandanla bir yerdədir.

- Vahid müəllim, diqqət etdikdə bəlli olur ki, erməni tərəfi daha çox Qara göl ətrafında səs-küy qaldırır. Buna səbəb nədir? Ümumiyyətlə, Qara göl haqqında Sizdə hansı məlumatlar var?

- Qara göl Azərbaycan dövlətinin ərazisidir. Bunu xəritə üzərində də hər kəs bilir. Yəni bura bizə aiddir. İndi ermənilər hay-küy salır, vay-şüvən qoparırlar... Ancaq bunun tarixdə, xəritədə olanlarla hər hansı bağlılığı, heç hüquqi əsası yoxdur. Dövlətimiz, Xarici İşlər Nazirliyi bu barədə öz mövqeyini bildirib. İndi ermənilər bilmirlər ki, nə etsinlər.

1987-ci ildə Nazirlər Kabinetinin qərarı ilə Qara gölün dövlət qoruğu elan olunması təsadüfi deyildi. O dövrdə Qara gölün dövlət qoruğu elan olunmasına dair qərardan mən də məlumatlı idim. Hərçənd, o zaman Nazirlər Kabinetində işləmirdim. Qara göl ona görə dövlət qoruğu elan edilib ki, ermənilər istədiklərinə nail olmasın. Yoxsa oranın suyundan, imkanlarından istifadə etməyə çalışırdılar. Qərar çıxarılması o demək idi ki, ora dəymək olmaz. Üstəlik, bu məsələ beynəlxalq məhkəməyə çıxarıla bilərdi. Ona görə belə qərar verilib.

Reyting.az




Bölməyə aid digər xəbərlər
{sape_links}{sape_article}