Deputat: “Bazarda inhisarçılığı məmurlar yaradır” - Müsahibə
Tarix: 29-10-2019 15:28 | Bölmə: Müsahibə / Slayd
Deputat: “Bazarda inhisarçılığı məmurlar yaradır”

Vahid Əhmədov deyir ki, Rəqabət Məcəlləsinin qəbulu inhisarçılığı və gizli iqtisadiyyatı müəyyən qədər aradan qaldıracaq

Ölkədə aparılan struktur islahatları çərçivəsində İqtisadiyyat Nazirliyinin səlahiyyətləri genişləndirildi, həm Vergilər Nazirliyi, həm də Əmlak Məsələləri Dövlət Komitəsi ilə Antiinhisar və İstehlak Bazarına Nəzarət Dövlət Xidməti bu nazirliyin tabeliyinə verildi. Prezidentin sərəncamı ilə İqtisadiyyat naziri təyin edilən Mikayıl Cabbarov artıq bu sahədə ciddi islahatlara başlayacaqlarını bildirir.

Reyting.az-ın bu və digər suallarına Milli Məclisin deputatı, Baş Nazirin keçmiş müavini Vahid Əhmədov cavab verib.

- Vahid müəllim, İqtisadiyyat naziri Mikayıl Cabbarov iqtisadi sahədə müəyyən islahatlara başlayacağını bildirir. Amma bu islahatları reallaşdırmaq üçün inhisarçılara qarşı ciddi mübarizə də aparılmalıdır. Bu mübarizə üçün Rəqabət Məcəlləsinin qəbulu böyük əhəmiyyət kəsb edir. Artıq neçə ildir hazırladığınız bu Məcəllənin qəbulu və işlək mexanizmə çevrilməsi üçün çalışsanız da, müsbət nəticə yoxdur. Milli Məclisdə bu məsələni yenidən qaldırmaq fikriniz varmı?

- Bu məsələ gündəmdədir. “Strateji Yol Xəritəsi” hazırlananda cənab Prezident bu məsələni ora daxil edib. Milli Məclisin payız sessiyası başlayan zaman bu məsələni Əli Məsimli ilə birlikdə qaldırdıq. Qeyd etdik ki, bu Məcəllə qəbul edilməlidir. Belə fikir səsləndi ki, Məcəllə artıq hazır formadadır. Hesab edirəm ki, 2019-cu ildə olmasa da, 2020-ci ilin yay sessiyasında bu sənəd qəbul olunacaq.

- Demək istəyirsiniz ki, bu məsələ gündəmdən çıxmayıb?


- Xeyir. Heç bir halda gündəmdən çıxa bilməz. Əksinə, çox qısa vaxtda gündəmə gələcək və qəbul ediləcək. Çünki dövlət başçısının bununla bağlı göstərişi var.

- Rəqabət Məcəlləsinin qəbulu nəyi dəyişə bilər?

- İstək budur ki, bazarda olan inhisarçılıq müəyyən qədər aradan qalxsın, gizli və ya qanunsuz sövdələşmələrin qarşısı alınsın. Mən demirəm ki, qanunun qəbulu ilə bu sahədə yüz faiz nəticə əldə edə biləcəyik, amma müəyyən qədər uğur qazanmaq mümkündür.

Yeni İqtisadiyyat naziri təyin edilib, o da bu işlə ciddi şəkildə məşğul olur və bu yaxınlarda öz mövqeyini açıqlayıb.

- Yeni nazir dövlət televiziyasında çıxışı zamanı konkret olaraq hansı sahələrlə bağlı işləyəcəyi mesajını verdi. Əsas işlərdən biri də inhisarçılığa qarşı mübarizədir. Sizin hazırladığınız Rəqabət Məcəlləsi inhisarçılığın aradan qaldırılmasında hüquqi baza rolunu oynaya bilərmi?


- Məsələ də bununla bağlıdır. Qanun olmalıdır. Hazırda elə bir qanunumuz yoxdur. Düzdür, İqtisadiyyat Nazirliyinin tərkibində Antiinhisar Xidməti var. Mənim fikrimcə, bu xidmət normal fəaliyyət göstərmir. Düzdür, bu xidmətin rəhbəri dəyişdi, amma onlar da bu məsələdə fəallıq nümayiş etdirməlidirlər. Nəhayət, qanun olmalıdır ki, ona uyğun addım atılsın. Mümkündür ki, yeni bir idarə yaransın və ya Antiinhisar Xidmətinin səlahiyyəti genişləndirilsin. Beləcə, bazarda inhisarçılığın qarşısı alınmalıdır. Demirəm ki, buna yüz faiz nail ola bilərik, heç olmasa, 40-50 faiz aradan qaldırıla bilər.

- Sizcə, inhisarçılığın aradan qalxması üçün nə lazımdır: iradə, qanun, yoxsa...


- İnhisarçılığın aradan qaldırılması üçün birinci növbədə məmur-oliqarx məsələsi həllini tapmalıdır. Yəni məmur gedib məmur fəaliyyəti ilə, biznesmen isə biznesi, ticarəti ilə məşğul olmalıdır. Bunlar ayrı-ayrı sahələrdir və bu sahədə olanların fərqli fəaliyyət yolları olmalıdır. Amma məmurun vəzifəsindən sui-istifadə edərək biznes qurması alınacaq bir şey deyil. Dövlət başçısı da bununla əlaqədar mövqeyini ortaya qoyub. Odur ki, əsasən bu problemi həll etməliyik.

Bazarda inhisarçılığı kim yaradır? Adi vətəndaş inhisar yarada bilməz. Bunu yaradan məmurlardır, hansı ki, imkan və təsirləri var. Bu təsirlər aradan qaldırılmalıdır.

- Həm Siz, həm də həmkarınız Əli Məsimli iqtisadi sahə ilə bağlı zaman-zaman müxtəlif təkliflər irəli sürürsünüz. Yeni nazirə təkliflər təqdim eləmək fikriniz varmı?


- Açığını deyim ki, Vergilər Nazirliyində gedən islahatlar müəyyən dəyişikliklərə səbəb olub, şəffaflığın təmin olunmasına gətirib çıxarıb. Hazırda biznesmenə və ya sahibkara təzyiq yoxdur. Yəni iş görürsənsə, vergini ödə, qalan məsələlərlə bağlı ciddi problem olmur. Eləcə də, Səfər Mehdiyev sədr təyin ediləndən sonra Gömrük Komitəsində müəyyən irəliləyişlər əldə edilib, sahibkarlarla bağlı məsələlər müəyyən qədər öz həllini tapıb. Mən demirəm ki, yüz faiz həllini tapıb, mümkündür ki, aşağı səviyyələrdə nələrsə var. Amma böyük mənada şəffaflıq təmin edilib, bu orqanlar tərəfindən sahibkarlara ciddi problemlər yaradılmır. Əgər problem olsaydı, yəqin ki, biz də şikayət alardıq.

Yeni təyin edilən nazirlərdən də şəffaflıq gözləyirik. Bizi nə maraqlandırır? Şəffaflığın olması, korrupsiya və inhisarçılığın aradan qaldırılması. Bu məsələlər həll edilməlidir.

Oktyabrın 15-dən sonra dövlət başçısı iki dəfə bu barədə danışıb. Əslində biz də uzun illərdir ki, bu məsələləri qaldırırıq. Hesab edirəm ki, bu məsələlər öz həllini tapacaq, mən buna inanıram. Çünki başqa yolumuz yoxdur.

- Vergilər Nazirliyi və Əmlak Komitəsinin İqtisadiyyat Nazirliyinə birləşdirilməsinə necə baxırsınız, müsbət nəticəni əldə etmək üçün öncə nədən başlamaq lazımdır?


- Əslində birləşmə, struktur dəyişikliyi gedəndə müəyyən mənada onun başında duracaq adam da nəzərə alınır. Bəli, Mikayıl Cabbarov özünü kifayət qədər islahatçı kadr kimi göstərib və çox böyük dəyişikliklərə imza ata bilib. Müəyyən mənada kölgə iqtisadiyyatını, ikili mühasibatlığı aradan qaldırmağa nail olub. Tam arxayınam ki, nazir Cabbarov bu sahədə də rəvan işlər görəcək, islahatlar həyata keçirəcək.

Konkret olaraq struktur dəyişikliyinə gəldikdə, hesab edirəm ki, müəyyən problemi yoluna qoymaq üçün birləşmə doğru addımdır.

- Sizcə, kadr islahatları da davam etdiriləcəkmi?

- Mütləq! Hələ islahat çox gedəcək. Yerli icra hakimiyyəti orqanlarında, aparatda, digər orqanlarda... Ümumiyyətlə, köhnə söz-söhbətdən qurtarmalıyıq. Əgər dövlət başçısı siyasi iradəsini ortaya qoyubsa, deməli, məsələni sona çatdıracaq.

Reyting.az
скачать dle 10.5фильмы бесплатно




Bölməyə aid digər xəbərlər
{sape_links}{sape_article}