Ziyafət Əsgərov: “İslahatlarla yanaşı cəza da olmalıdır” - Müsahibə
Tarix: 01-06-2020 10:21 | Bölmə: Müsahibə / Slayd
Ziyafət Əsgərov: “İslahatlarla yanaşı cəza da olmalıdır”

Milli Məclisin komitə sədri: “Əgər məmur institusional islahatları qəbul etmirsə, bu halda cəzalanmalıdır. Yəni bu iki proses paralel aparılmalıdır”

Son vaxtlar Azərbaycanda nazir müavini və bir neçə icra başçısının korrupsiya və rüşvətxorluq ittihamı ilə həbs edilməsi cəmiyyətdə böyük dəstək qazandı. Hətta bəzi rayon sakinləri sosial şəbəkələr vasitəsilə ölkə başçısına çağırış etdi ki, yaşadıqları bölgələrdə də belə əməliyyatlar keçirilsin.

Milli Məclisin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov Reyting.az-a müsahibəsində deyib ki, korrupsiya və rüşvətxorluq hallarına qarşı mübarizə islahatlarla paralel aparılmayanda effekt vermir.

- Ziyafət müəllim, son dövrlər ölkəmizdə korrupsiya və rüşvətə qarşı sərt tədbirlərin şahidi oluruq. Bu tədbirləri peşəkar hüquqşünas kimi necə qiymətləndirirsiniz?

- Aparılan siyasəti dəstəkləyirəm. Bildirim ki, 1969-cu ildə Ulu öndər hakimiyyətə gələndə onun ilk atdığı addımlardan biri korrupsiyaya qarşı mübarizə idi. Yəni bu siyasətin əsası o zamandan qoyulub.

Xatırlayıram, Ulu öndərin dəstəyi ilə “İstintaq” filmi çəkildi. Bu film Sovet İttifqında böyük əks-səda doğurmuşdu. Hətta Ulu öndərə digər müttəfiq respublikaların birinci katibləri zəng edib deyirdilər ki, siz necə cəsarətlə film çəkmisiniz. Əslində Ulu öndər göstərdi ki, cəmiyyətdə belə bir problem var və buna qarşı mübarizə aparmaq lazımdır.

Bu gün də korrupsiya və rüşvətə qarşı mübarizə aparılır və mütləq aparılmalıdır. Çünki korrupsiya ən ağır cinayətlərdən biridir. Həm də ona görə ki, “metastaz” verir, cəmiyyəti içindən yeyir, dövləti içəridən sarsıdır. Odur ki, bu bəlaya qarşı çox ciddi mübarizə aparılmalıdır. Bu mənada cənab Prezidentin bu siyasətini birmənalı dəstəkləyirik. Hesab edirəm ki, bu siyasət davam etdirilməlidir.

- Siz təcrübəli hüquqşünassınız, necə düşünürsünüz, həbslərlə korrupsiyanın qarşısını almaq və effektiv nəticə əldə etmək mümkündürmü?

- Diqqət edin, cənab Prezident dəfələrlə xəbərdarlıq edirdi. Bir dəfə, iki dəfə, üç dəfə... Yəni cənab Prezident çalışdı ki, bu məsələni islahatlar yolu ilə həll etsin. Yeri gəlmişkən qeyd edim ki, islahatlar yolu ilə effektiv nəticələr əldə olundu. Məsələn, “ASAN Xidmət”in yaradılması milyonlarla insanda məmnunluq yaratdı. Hazırda “Dost” mərkəzləri açılır. Amma deyirsən, xəbərdarlıq edirsən... Lakin düşünülür ki, belə də davam edəcək. Bu mənada institusional islahatlarla yanaşı cəza da olmalıdır. Bəs Cinayət Məcəlləsi nə üçündür? Cinayət Məcəlləsində rüşvət və korrupsiyaya qarşı xüsusi maddələr var. Əgər məmur, vətəndaş institusional islahatları qəbul etmirsə, bu halda onu cəza gözləyir. Sözümün mahiyyəti odur ki, bu iki proses paralel getməlidir. Paralel getməyəndə effekt vermir. Əlbəttə, bununla yanaşı maarifləndirmə də aparılmalıdır və bu da vacibdir.

- Arqumentlərinizi inkişaf etdirə bilərsinizmi...

- Biz deyirik ki, hüquqi dövlət qururuq. Hüquqi dövlət nədən başlayır? Mənim qənaətimcə, hüquqi dövlət uşaq bağçasından başlayır. Uşağ bağçası dedikdə, mən təlim-tərbiyə məsələsinə vurğu edirəm. Uşaq bağçası, daha sonra məktəb. Biz uşaqlarımızı dövlətçilik təfəkkürü ilə tərbiyə etməliyik. Baxın, hüquqi maarifləndirmə, hüquqi tərbiyə, hüquqi mədəniyyət və hüququn aliliyi. Görürsünüz, son nəticədə gəlib hüququn aliliyinə çatılır. Son məqsəddə biz buna nail olmaq istəyirik ki, cəmiyyətdə insanlar hüququn aliliyini qəbul etsinlər. Belə olduğu təqdirdə müzakirə etdiyimiz problemlərin ortaya çıxmasına əsas qalmayacaq. Yəni nə rüşvətə yer olacaq, nə də korrupsiyaya.

Hüquqi dövlət sadəcə, elmi konsepsiya deyil. Bu konstitusiyada təsbit olunan normativ prinsipdir. Odur ki, bu tərbiyə uşaq bağçasından, məktəbdən başlamalıdır. İnsanlar maarifləndikcə onların hüququ mədəniyyəti artır. Hüquqi mədəniyyət artdıqca belə halların kökü kəsiləcək.

- 2018-ci ildən başlayaraq gənclər yüksək vəzifələrə irəli çəkilir, müxtəlif təyinatlar olur. Siz, kadr dəyişiklikləri və dövlət idarəçiliyində gəncləşməyə necə baxırsınız?

- Gənclərin irəli çəkilməsini alqışlayıram. Bu, tamamilə doğrudur. Çünki yeni dövr, yeni idarəetmə texnologiyalarını gənclər daha yaxşı qavraya bilirlər. Bəzən təcrübə məsələsini qabardırlar. Bilirsinizmi, gənc bu təcrübəni harada qazanmalıdır? Gərək işləsin və bunun nəticəsində təcrübə qazansın. Odur ki, buna normal yanaşmaq lazımdır. İşləyib təcrübə qazancaqlar.

- Sizcə, kadr dəyişikliyi əslində idarəçilikdə nəsl dəyişikliyinin baş verdiyini göstərmirmi?

- Mənim fikrimcə, burada nəsilləri üz-üzə qoymaq düzgün deyil. Cənab Prezident də dəfələrlə vurğulayıb ki, gənclərin enerjisi, onların müasir idarəetmə metodlarını daha yaxşı mənimsəməsi ilə paralel yaşlı və orta nəsillərin təcrübəsinin birləşməsi vacibdir. Bunlar bir-birini tamamlamalıdır. Siyasət də bu istiqamətdə gedir.

- Korrupsiya və rüşvətdən əl çəkməyən məmurlar, buna görə cəzalandırılan şəxslər hər hansı bir problem və ya təhdid yarada bilərlərmi?

- Azərbaycan o vəziyyətdə deyil ki, kimsə ona təhdid yarada bilsin. Azərbaycan çox güclü dövlətdir, bizim çox güclü iradəsi olan Prezidentimiz var və heç kim də bizə təhdid yarada bilməz. Əgər dövlət korrupsiyaya qarşı mübarizə aparırsa biz niyə təhdid olunmalıyıq? Buraxmalıyıq başlı-başına? Belə olması mümkün deyil. Xalq Prezidentin bu siyasətini dəstəkləyir. Xalqımız Prezidentin yanındadırsa, Xalq-Prezident birliyi möhkəmdirsə, vəhdət varsa, bunun qarşısında heç bir maneə ola bilməz. Siz də daima cəmiyyətin müxtəlif təbəqələri ilə ünsiyyətdə olursunuz. Görün, bir nəfər Prezidentin apardığı bu siyasətə qarşı çıxış edirmi, narazı olan varmı?

- Yoxdur...


- Əlbəttə. Əksinə, Prezidentə güclü ictimai dəstək var. Rüşvətxoru, korrupsioneri kim müdafiə edər? Heç kim. Hesab edirəm ki, Prezidentin bu istiqamətdə apardığı siyasət, görülən tədbirlər xalq tərəfindən birmənalı dəstəklənir və belə də olmalıdır.

Reyting.az
скачать dle 10.5фильмы бесплатно




Bölməyə aid digər xəbərlər
{sape_links}{sape_article}