Əli Məsimli: “Açıq və gizli formalarda islahatlara mane olacaqlar” - Müsahibə
Tarix: 21-10-2019 08:58 | Bölmə: Müsahibə / Slayd
Əli Məsimli: “Açıq və gizli formalarda islahatlara mane olacaqlar”

Deputat: “Mahiyyətləri ictimaiyyətə yaxşı bəlli olan məmurlar islahatlara meylli deyillər və onu gözdən salmaq istəyirlər”

Oktyabrın 15-də iqtisadi məsələlərlə bağlı müşavirədə Prezident İlham Əliyevin islahatlara mane olmağa cəhd edən məmurlara ünvanladığı mesajlar həm də ciddi xəbərdarlıq idi. Görəsən, dövlət başçısının bu dəfə daha kəskin mesajlar verməsi bundan sonrakı proseslərə necə təsir edəcək?

Reyting.az-ın bu və digər suallarına Milli Məclisin İqtisadi siyasət, sənaye və sahibkarlıq komitəsinin üzvü, İqtisadi və Sosial İnnovasiyalar İnstitutunun rəhbəri Əli Məsimli cavab verib.

- Prezident İlham Əliyev oktyabrın 15-də iqtisadi məsələlərə həsr edilmiş müşavirədəki çıxışı zamanı bir sıra məsələrə toxundu. Onlardan hansılarını daha daha vacib hesab edirsiniz?

- Prezident İlham Əliyev iqtisadi məsələlərə həsr edilmiş müşavirədəki çıxışı zamanı çox ciddi məsələrə toxundu. Onların arasında islahatların davam edəcəyi və həyata keçirilən islahatların kadr islahatları ilə müşaiyət olunacağı, islahatlara mane olanlarla yolların ayrılacağı barədə mesajı, eləcə də korrupsiyaya qarşı mübarizənin gücləndirilməsi, büdcə vəsaitindən istifadə sahəsindəki problemlər və qeyri-neft sektorunda artım templərinin sürətləndirilməsi kimi məsələlər daha çox diqqət çəkir.

- Sizcə, Prezident çıxışındakı həmin məqamları əvvəlki dövrlərlə müqayisədə daha kəskin şəkildə qabartması nə ilə əlaqədardır?

- Fikrimcə, bu xeyli dərəcədə hazırkı mərhələnin çağırışları, əhalinin islahatlardan gözləntiləri, istəkləri ilə bağlıdır. Bu, həm ölkədə islahatların dərinləşdirilməsi və nəticəliliyinin yaxşılaşdırılması zərurətindən doğur, həm daxili, həm də dünya iqtisadiyyatında gedən qeyri-adi və təhlükəli meyllərlə bağlıdır. Yəni potensialımızdan istifadənin səmərililiyini artırmaq, islahatları dərinləşdirmək, iqtisadiyyatımızın artım templərini sürətləndirmək və əhalinin güzəranının yaxşılaşdırılması istiqamətlərində başlanan işləri davam etdirmək lazımdır.

- Hazırda dünya iqtisadiyyatında gedən proseslər ölkəmizdə hansı sahələrdə daha çox işlərin görülməsini zəruri edir?

- Hazırda dünyada gedən proseslər dünya iqtisadiyyatını da təhlükəyə sürükləməkdədir... Ona görə də qlobal iqtisadiyyat sahəsində baş verən ziddiyyətli meyllər və qarşıdurmalar mütləq qarşıdakı illərdə dünya iqtisadiyyatında ciddi problemlərə və dəyişikliklərə gətirib çıxaracaq. Bununla əlaqədar olaraq Azərbaycanda başlanan islahatlarda, ortamüddətli perspektivdə dünya təsərrüfat sisteminin simasını müəyyən edəcək, bəlkə də dizaynını dəyişdirəcək əsas trendləri nəzərə almaqla çevik dəyişikliklər etməyi bacarmaq mühüm çağırışa çevrilib. Həmin risk və çağırışlar iqtisadiyyatın idarə edilməsi və tənzimlənməsinin elmliyinin, innovativliyinin və kreativliyinin artırılmasını, dövlətin iqtisadiyyatdakı rolunun, eləcə də idarəetmə sisteminin təşkilati strukturu, kadr tərkibi və koordinasiyasının optimallaşdırılmasını, korrupsiya, inhisarçılıq, məmur özbaşınalıqlarının və bunlardan doğan çoxsaylı neqativlərin aradan qaldırılması istiqamətində başlanan işlərin genişləndirilməsi və sürətləndirilməsini, biznesdə məmur sahibkarlığının, məmur himayədarlığının aradan qaldırılmasını, struktur islahatları vasitəsilə dövlətin, cəmiyyətin, biznesin və qabaqcıl texnologiyanın səmərəli kombinasiyasına nail olunmasını tələb edir.

Daxili amillərə gəldikdə, onu demək olar ki, Azərbaycan öz inkişafının yeni mərhələsinə keçir və Prezident seçkilərindən sonra yeni mərhələnin tələblərinə uyğun islahatlar həyata keçirilir. İslahatlar şəffaflığın, məsuliyyətin, fəaliyyətə görə cavabdehliyin artırılmasına, xalqa xidmət işinin yaxşılaşdırılmasına yönəlib. Bu cür anlayışlar kimə yaddırsa, təbii ki, islahatların genişlənməsini və dərinləşməsini istəmir. Ona görə də vəzifədə olanların bir hissəsi açıq və gizli formalarda bu islahatlara mane olacaqlar ki, vəzifəyə gətirilən yeni kadrların gördükləri işlərin səmərəsiz olduğu təəssüratı yaransın... Bununla bağlı Prezident müşavirədə açıq mətnlə bildirdi ki, bu gün iqtidarda olan bəzi şəxslər də islahatlara qarşıdır.

Təbii ki, deyilənlər bütün köhnə kadrlara şamil edilmir. Məhz mahiyyətləri ictimaiyyətə yaxşı bəlli olan məmurlar islahatlara meylli deyillər və islahatları gözdən salmaq istəyirlər ki, bəd əmllərini davam etdirə bilsinlər. Ona görə də Prezident müşavirədə bildirdi: “Kim ki altdan-altdan işimizə mane olmaq istəyir, biz belə adamlarla bir yolun yolçusu ola bilmərik".

Hazırkı şəraitdə islahatları genişləndirmək, dərinləşdirmək və nəticələrini yaxşılaşdırmaq çox zəruri şərtdir və sistemli şəkildə həyata keçirilməlidir. Bu, həm də korrupsiyadan, inhisarçılıqdan, məmur özbaşınalıqlarından təngə gəlmiş və aparılan islahatlardan öz həyat səviyyəsinin yaxşılaşacağı ümidi ilə yaşamağa başlayan insanların istəyidir. Ona görə də bu müşavirədə irəli sürülən mesajları reallaşdırmaqdan ötrü islahatlar yolu ilə korrupsiya və inhisarçılığa qarşı mübarizə gücləndirilməli, vəzifələrə əsasən dövlətçilik təfəkkürlü, fikirdə, sözdə və əməldə xalqına bağlı, yeniliyə meylli, rüşvətə və korrupsiyaya bulaşmamış gənc mütəxəssislər gətirilməli, büdcə xərcləmərindəki şişirtmələr və digər mənfi hallar aradan qaldırılmalı, iqtisadi artım templərinin sürətləndirilməsi və əhalinin güzəranının yaxşılaşdırılması sahəsində başlanan işlər sistemli şəkildə davam etdirilməlidir.

Həmin tədbirlərin sistemli şəkildə həyata keçirilməsi ilə 2020-ci ildən iqtisadiyyatımız proqnozlaşdırıldığı kimi, 3 faiz yox, 5 faiz və ondan yüksək artım trayektoriyasına çıxa, maliyyə sisteminin səmərəli fəaliyyətini və bu əsasda orta perspektivdə əhalinin bütün təbəqələrinin layiqli həyat səviyyəsi təmin edilə bilər.

Reyting.azскачать dle 10.5фильмы бесплатно




Bölməyə aid digər xəbərlər
{sape_links}{sape_article}